Este anyo empesimos el invyerno kon una temperatura de enverano. Un empesijo del mez de Febrero kon tanto sol i kalor mos parese adjayip, ma en supito mos kayo la inyeve. Oy munchos artikolos mos avlan del klima ke se esta trokando, ke tenemos sekiya, ke aze muncha luvya i kon los deres ke se forman, munchas kayes se inondan o okure munchos danyos. Estos artikolos me azen akodrar la interpretasyon de Yosef a Tsadik sovre el esfuenyo de las 7 vakas i los 7 trigos i lo ke dize el “Kohelet”: “Nada de muevo debasho del sol”. Es dizir ke siempre uvo anyos kon muncha o poka luvya, kon sekiya o abundansya, kon kalor en invierno o friyo en enverano. No olvidar ke uvo un tiempo, ke el estrecho de Berring no egzistiya komo el estrecho del Bosfor de Estanbol no egzistiya.
Oy, ay islas ke no egzistiyan komo ay sivdades de la antikuedad ke están undidas en la mar. En siertos deziertos i montanyas se enkontran restos de vida akuatika i mizmo fosiles de elefantes, kokodrilos, jirafas kon grande kantitad de polen, lo ke afirma la prezensya perdida de boskes vedres i abundantes. Hector Navarro en 2019 eskrivyo asi, “Devido a los siklos que tiene el sol en los kuales emite mayor o menor temperatura tenemos el fenomeno de "El Ninyo" i de "La Ninya", ke alternan kada diez o dodje anyos. Ay otro siklo ke tiene unos kinyentos anyos: entre los anyos 850 i 1350 el mundo bivyo un kalor global ke los klimatologos yamaron "Optimo Klimatiko Medyeval". En esta epoka los Vikingos de Danimarka kolonizaron Groenland ande rekoltavan trigo i kriyavan ganado (animales para la karne) ande agora ay glasyares. Kuando empeso el siklo de fríyo yamado "Pekenya Edad de Yielo" ke duro entre los anyos 1350 i 1850 aproksimadamente, los Vikingos tuvyeron de salir de Groenland, ke fue desgrasiadamente inabitable para el ombre. Sin embargo, desde 1850, la umanidad esta benefisyando muevamente por un siklo de kalor provokado por el sol, lo ke yevo al imenso desvelopamyento siyantifiko, teknolojiko, ekonomiko, politiko i spiritual ke estamos tomando plazer en la aktualidad. En sien anyos se dupliko la esperanza del promedyo de vida.”
Savemos ke una de las razones de estos trokos, es el kamino de muestro mundo ke aze al torno del sol. No es una linya redonda ke aze, ma es una linya eliptika. Una otra razon puede ser las variasyones de la radiasyon del sol komo las variasyones de la enerjiya del sentro de la tierra. Kon muestros ojos aviamos visto ke la agua se vazyava de la derecha a la siedra o de la siedra a la derecha segun ke estavamos 2 metros al norte de la linya del ekuador o 2 metros al sud de esta linya. Se supone ke la disparisyon de la sivilizasyon Maya fue el resultado de una sekiya ke trusho la mankura de komer i esto kavzo la lucha para sovrebivir i ke eskapo kon su disparisyon. Las furtunas ke se ven espesyalmente en la Amerika, las luvyas de “Muson” ke se ven en Indya i en esta parte del globo, las inondasyones eksesivas ke se ven en syertas sivdades del mundo, todas estas entamperiyas son devidas a las kondisyones ke mensyoni mas ariva. Lo mas de estos trokos del klima se izyeron durante miles de anyos, ma uvo tyempo ke estos trokos akontesyeron tanbyen subitamente. Grasyas al Dio ke el umano supo adaptarse a todo modo de trokos de klima i de kondisyones de vida komparado a syertas rasas de bestya ke dezaparesyeron por no pueder adaptarsen a estos trokamyentos…
Estos trokamyentos no estan en muestras manos. Lo ke si esta en muestras manos es la lucha kontra la polusyon del ayre, la polusyon de la tierra, la polusyon de la agua i la polusyon ke kavzan los produktos plastikos danyando el mundo. Esperamos ke en todo el mundo las muevas jenerasyones seran mas savias para protejar muestro mundo tan kansado de ser mal tratado.
