Sivan, asigun el kuento de la Tora, es el treser mez del kalendaryo ebreo. Es atado al trivio de Zevulun, dalkavo ijo de Lea. Su nasimyento fue un regalo para su madre i komo es dicho, “Zevulun inche el korason de su madre de alegriya”. El sinyo spiritual de Sivan es kaminar i es adelantre kaminar verso la mijoriya, la elevasyon spiritual, la elevasyon de muestra alma. El trivio de Zevulun es trivio de komersantes ke kaminan, ke se van de un lugar al otro i sostienen todos los otros trivios sovre todo su ermano Isashar ke se da enteramente al estudio de la Tora i toma su ayudo material de Zevulun. Kuando los trivios kaminavan en el dezyerto, el torno del Mishkan al Sud, Zevulun era unos elementos del kampo, ande Yehuda era el lider. Su bandiera es blanka kon una vela desinada enriva. Su piedra presioza es el diamante.
Agora mos aretaremos sovre un punto emportante del mez de Sivan. Dizimos ke es el treser mez de muestro kalendaryo, el shifro tres “3” mos amostra munchos puntos enteresantes.
1- Nisan, Iyar, Sivan son tres etajes verso la Matan Tora. Nisan, salidura de Ayifto, pasaje i avyertura de la mar Kolorada. Iyar, Omer, Pesah Sheni, Lag Baomer i la magna ke anyos va kayer de los sielos i enfin Sivan, mez de Matan Tora, ande resivimos la Ley.
2- El Shir Ha-shirim mos da en una sola fraza, estos grados de muestro arivo al Matan Tora: “Yo esto kaminando verso tu”. Salidura de Ayifto, esto koryendo detras de ti (Omer). El Rey me envito en sus apartamentos (Matan Tora).
3- Tres son los “Shalosh Regalim”: Pesah, Shavuot i Sukot.
4- Tres son las tres partes del Tanah (Tora), Neviim (Profetos), Ketuvim (Los eskritos).
5- El puevlo de Israel komporta tres grupos: Los Leviim, Los Kohanim i Israel. En el mez de Sivan, el puevlo de Israel kumplió los dalkavos pasos verso el Sinay i la Tora. De su salidura de Ayifto estuvo kaminando adelantre despartiendo spiritualamente de sus vistidos de servitud, la karga de su esklavaje, alevantando enfin su kavesa i enderechando su espalda kansada i ampezando a respirar el ayre de la libertad.
Ermanos keridos, en kontando el Omer i mozotros estamos kaminando syete etapas, syete sefirot, 49 diyas para parvinir a salir del selo, de la negrigura i de todo el mal, i alkansar komo 33 siglos antes la santedad del Matan Tora, i el kamino de muestra Ley.
Komo Avraam Avinu, a ken el Bendicho El le disho, “Leh Leha”, desha la Mezopotamya kon sus idolos, tu sivdad i la kaza de tu padre, vate verso el lugar ke te amostrare i te azere de ti un grande puevlo…
Saliremos i mozotros de la servitud de muestros defektos i kaminaremos verso la Luz de muestros Santos Komandamientos.
