La semana pasada me fui kon mi amiga al Palasio “Küçüksu”, ke se topa en el distrikto Küçüksu en Estambol en el lado asiatiko.
Mos topimos en Etiler para tomar el funikular ke ayega a Aşiyan en sinko puntos. Despues mos suvimos a una barka para ir a Küçüksu.
Una vista maraviyoza, aryento de un parko grande yeno de verduras golyendo al miskle, un palasio chiko briyando komo una perla delantre la mar.
Fue konstruido por el arkitekto, Nigogos Balyan, para el Sultan Abdülmecit, i fue terminado en el anyo 1856.
En el 17en syeklo, el famozo viajero Evliya ÇELEBİ avlo de este palasio komo “Un Rio de Vida”, en el ke se puede viajar kon barkos. Lo deskrivyo komo un lugar trankilo entornado de guertas i de rozas.
El palasio Küçüksu se avyo a los vijitadores komo muzeo-palasyo en 1983. Fue konstruido de tres etajes sovre una area de 15x27metros kon la teknika de albanileria.
El etaj del bodrum es un kiler i la kuzina de servisyo; los otros etajes son disponibles en forma de kuatro kamaretas ke se avren a un espasyo intermedyo.
Kon esta karakteristika, la struktura reflekta el tipo tradisyonal turko. Se utilizo aki motivos ornemantales, oksidentales en frente de la mar kon las olas vibrantes.
La pisina chika kon una fuente apuyada en esta fachada i sus eskaleras.
Tyene una aparisyon de un muzeo riko de arte kon sus techos dekorados kon relieves i lavoros echos de mano, chimeneas echos de presyozos marmoles italyanos, en diferentes kolores i formas, mobles de stilo evropeo, tapetes vinidos de Iran, i munchas pinturas, tablos de una grande valor.
La entrada del edifisyo desde el paseo maritimo de los reyes se kompletava kon una pisina chika, kon una fuente i una eskalera de dos brasos.
Este muzeo chiko ke tyene una fachada kon manyifikas dekorasyones, fue desinyada komo un lugar de deskanso en la rejyon ande los governantes viniyan a kasar.
Este edifisyo konosido komo “Göksu Kasrı” fue uno de los pavyones de embarkamyento de los sultanes. Estos pavyones son edifisyos mas grandes ke las rezidensyas, ke se konsideran propriedad ekslusiva de los sultanes i se konstruizen afuera de los palasyos. Los pavyones ke no se utilizan para la rezidensya permanente, son los lugares donde los sultanes pasavan el tyempo para deskansarsen.
El pavyon Kuçuksu es un pavyon de embarkamyento konstruido por la famiya Balyan, durante el reynado del “Sultan Abdülmecit”. Komo estan afuera de los palasyos, ay mas de una kamareta de envitados en este edifisyo, donde los sultanes no lo uzavan komo espasyo abitable, sino ke solo para envitasyones.
