"Es razon de alavar a el D-o grande i poderozo
Kon temeridad de korason, alegria i gozo
En el dia el este santo y temerozo.”
Estas linyas en el empesijo de la Ketuba de la Ley en Ladino mos embeza a nozotros la ermozura de esta fiesta de Shavuot. Kada anyo komo en kada fiesta los djudyos resiven la Ley de nuevo en el monte de Sinay.
Komo de uzo, en Shavuot komemos komidas de leche. Ya ay munchos detalyos para esta tradision. Yo keria mensionar aki unos kuantos detalyos sovre esta tradision ke me embezo mi Rabino en Izmir, Rav Nisim Barmaimon, de bindicha memoria.
Moshe Rabenu nasio en 7 Adar. Su madre lo guadro tres mezes i despues lo metyo al rio. Kuando la ija de Paro lo salvo de el rio, bushko una mujer para aletar a Moshe. Miriam, su ermana, le trusho a Yoheved, su madre. Yoheved, la madre de Moshe lo aleto a su ijo de nuevo en la data de 7 Sivan ke es la fiesta de Shavuot. Por esto komemos komidas de leche.
Otra razon: en el dia de Shavuot, la montanya de Sinay estava blanka komo el kezo. El Teilim en el mizmor 68 yama a la montanya “ar gavnunim”. Este biervo tyene koneksion kon el biervo de “gvina – kezo”.
Bendicho el Todo Poderozo ke mos ayego a este dia. Es tiempo de rogar para todos un moed alegre, enveranada buena kon salud buena, kon ganansya i prosperidad, kon paz en el mundo i en ta tierra de Yisrael, amen.
Shabat Shalom ve Moadin Lesimha
