De vez en kuando lavorash kon un departamento de una banka i no estash kontente. Ken es el kulpante? La direktrisa o el ke es responsavle de vuestros kuentos? No es la kulpa de la banka i puedeser de dingunos… Puede ser no vos dyo la grasya kon los ke lavoran en este departamento. Si trokash de Departamento puede ser vash a estar muy orozos de lavorar kon esta banka i este departamento.
Es la mizma koza kuando lavoramos kon un posto de una asosiasyon, de una fondasion mizmo kon un Atashe Kultural de un Konsolato. Todo depende de la persona ke es responsavle de este posto. Anyos lavorimos kon Pablo Asuero kuando era direktor del Instituto Cervantes. De mi parte dospues no topimos la mizma amistad. Ay unos kuantos mezes ke Fernando Vara del Rey fue nomado al posto de Direktor del Instituto Cervantes de Estanbol. Ay munchos anyos ke lo konosemos porke lavorava por el Ministerio del Eksteryor (de Espanya) i era responsavle de las reuniones ke se realizan kon los Sefaradim de las kuatro partes del mundo. I estuvimos endjuntos en diferentes sivdades del mundo. Dospues ke empeso su lavoro en Estanbol, mos vino a vijitar en el Muzeo Djudio. I mos proposo un alay de aktivitades ke puediamos azer. Pensimos ke va ser enteresante de realizar la eksposision sovre el livro de Javier Zafra: “Savores de Sefarad”. I lo realizimos. Dainda es posivle de vijitar esta ekspozision en la Galeria del Muzeo. La avyertura de esta ekspozision se realizo una tadre de alhad kon la prezensia de Javier Zafra i kon los e-mailes ke fueron embiyados de la parte del muzeo i kon las invitasiones de Elda Sasun i Dalia Sayah reelmente bastantes personas vinieron a esta avyertura. Mos demandaron si aviya un livro de la ekspozision. Malorozamente izimos livros en fotokopia de todos los panos. I la djente se enteresaron bastante.
Esta semana teniamos una reunion en el Instituto Cervantes kon Fernando i su ekipa. I mos fuimos kon Karen. Los tyempos dalkavo me estan demandando si ay kursos de Judeo-Espanyol. Malorozamente no estamos organizando kursos asemejantes en el Sentro Sefaradi. Ma ya savia ke Can Evrensel esta dando kursos en Judeo-Espanyol en una universidad en Estambol. I lo propozimos al Instituto Cervantes. Kreo ke empesando del mez de Septembre se van a realizar kursos asemejantes.
Keren organizar una ekspozisyon i un seminaryo sovre los livros Iber-Amerikanos i mizmo Sefardis. I kreo ke devemos lavorar i organizarmos para ser bastante efikache i mizmo vender muestros livros en lingua Judeo-Espanyola en esta aktivitad.
Todo modo de komidas atira la atansyon de la djente. I dyeron karar de organizar kursos de “gizado sefaradi” en un lugar ande se topa kozinas para 20 personas. Ma keremos ke la ke va ensenyar este gizado konoska el Judeo-Espanyol o el Espanyol. Va eskrivir i en turko en el Şalom para topar mansevas ke pueden realizar este dover. Va ser un plazer de lavorar kon el Instituto Cervantes. A la fin de esta aktivitad todos los partisipantes van a komer lo ke gizaron.
