En la bendisyon ke nos bendizen los Koanim egzisten sesh bendisyones. Ad… te bendiga i te guadre. Aga alumbrar Ad… Su Kara sovre ti i te engrasye. Alse Ad… Su Kara a ti, i poze en ti pas.
El Koen ke se topa serka El Kriyador, por kavza de su misyon ke es de ayegar sirvisyos (korbanot) siguramente ke son resividas las bendisyones ke eyos nos bendizen. Komo es dicho, persona ke es ojo arto es bendicho i tambien sus bendisyones son resividas.
En el Talmud es dicho, los malahim (andjeles) le disheron a el Sinyor del Mundo: “En la ley ke dates a el puevlo Djudyo eskrive, ‘Porke Ad… vuestro Dyo es Dyo de los dyozes, i sinyor de los sinyores? Dyo grande poderozo i terrivle ke no resive fases, komo eskrivites en la bendisyon de los Koanim “Alse Ad... sus fases a ti?”’
El Kriyador responde dizyendo “komo ke no alse mis fases sovre el puevlo Djudyo? Yo les enkomendi dizyendo, ‘Vas a komer i te vas a artar i vas a bendizir a tu Dyo.’ Ma mi puevlo malgrado ke komen kantidad de una azetuna eyos no mankan de dizir Birkat Amazon (la beraha de despues de komer).”
No ay mas grande kualidad en la persona de ser ojo arto ke esparte de lo bueno ke le dyo El Kriyador, a los ke poko tyenen. Ansi los Koanim bendizen de la bendisyon ke les dyo El Kriyador a el puevlo Djudyo.
En la bendisyon ke nos bendizen los Koanim nozotros prononsamos dizyendo te bendiga El Kriyador i te guadre.
El Kriyador bendize a los ombres, a ken le da sensya, a ken rikeza. El savyo tyene un entronpeso de tomarse gaava (grandeza) por su sensya. El riko tyene myedo de pedrer su rikeza. Ma El Sinyor del Mundo no basta ke le da a la persona su bendisyon i lo guadra de toda manera de entronpesos.
Despues ke meldamos en la perasha las bendisyones ke nos bendizen los Koanim, para ke seyan resividas enfrente El Kriyador devemos, ser prontos a resivir estas bendisyones. El Kriyador nos da a abondansa nuestros dezeyos. Nuestros savyos las bendisyones las asemejan a un riyo, el riyo onde se topa syempre manadero de aguas.
