La estoria de Rut empesa kon una buena famiya judiya ke tyenen un problem. La ambre en Bethlehem forsa Elimeleh, su mujer, i sus dos ijos a fuyirsen de Betlehem, i establisersen en Moab, en el este, para pueder topar kualo de komer. En Moab, esta famiya biven dyez anyos. Los ijos se kazan kon dos ijas de aya: Rut i Orpah. Biven orozos por dyez anyos.
Ma, malorozamente, Elimeleh i sus dos ijos se mueren. Naomi i sus dos elmueras Rut i Orpah, kedan sin maridos, i tyenen menester de ayuda. Naomi se desida a tornar a Betlehem. Naomi les roga a sus elmueras de kedarsen en Moab. Orpah aksepta de kedarse en Moab. Ma Rut no la desha a su esuegra sola, i aze un sakrifisyo grande en deshando su dio, i akseptando el Dio de Israel. Naomi aksepta el sakrifisyo de Rut, i la desha akompanyarla. En Bethlehem, la vida esta difisil para las mujeres. Naomi se siente muy triste, i Rut empesa a lavorar en los kampos, arekojyendo produktos. Aya, Rut rankontra un mansevo riko ke se yama Boaz. Boaz se enamora de Rut, i empesa a azerle komplimentos. Boaz tambien es paryente de Elimeleh, marido de Naomi. Kuando Naomi oye avlar de Boaz, i le dizen ke Boaz es un mansevo muy bueno, eya aze un plano para ke Boaz se kaze kon Rut. Rut va irse a la kamareta de Boaz de noche en sekreto, i se va echar en sus pyezes. Rut aze lo ke la esuegra le dize, i Boaz se syente muy kontente en vyendo ke Rut lo kere byen. Boaz le dize a Rut ke se kere kazarse kon eya, ma Naomi tyene otro un paryente ke se kere kazarse kon Rut, i Naomi le aviya dado palavra ke se la va dar a Rut.
Boaz sale al kamino para avlar kon este mansevo. Todos estan asperando kon grande kuryozidad para ver kualo va ser la fin. Komo resultado, este paryente esta mas enteresado a merkar un terreno ke Naomi tyene, ma no esta muy enteresado a kazarse kon Rut.
Ansi azen un akuerdo, el ombre dize ke se arepintyo de kazarse kon Rut. Agora Rut i Boaz estan libres, i se pueden kazar. Las kampanas de boda empesan a sonar i todos estan kontentes.
Rut i Boaz tyenen un ijo. Naomi esta muy oroza de tener un inyeto. Las mujeres de la sivdad le dan el nombre Obed al bebe. Este bebe es el nono del Rey David.
La estoria de Rut i Boaz es una muy ermoza estoria de amor, i de sakrifisyo. Es una estoria ke amostra el poder del amor, el poder del sakrifisyo, i de la obediensya.
La estoria de Rut se melda en Shavuot por munchas razones. La primera razon es el muvimyento fiziko ke estan azyendo en arekojendo los produktos de la tyerra. El empesijo del amor de Rut i Boaz toma lugar en Shavuot en kultivando la tyerra. La segunda razon es ‘arekojer el produkto’ en el sensyo espiritual ke tyene lugar en la estoria. Esto se ve kuando Rut aksepta a reunirse kon la Tora, i kon el Dio de Israel.
