Anna Eskenazi
Asoplar el vidriyo es un arte antiguo i istoriko. Soplando el vidriyo a una flama muy kayente, este soplo da vida al vidriyo i kon la kapachidad kreativa del artista toma formas diversas. Artikulos ke se emplean kada dia i otros ke son striktamente dekorativos se preparan por estos artistos talentuozos. El vidriyo se ve en statuas, almenaras, lampaderas, vazos, ventanas, puertas, alahas o kompletos de mezas de distintas kolores i formas ke se emplean o simplemente dekoran los interiores. Los muzeos azen ekspozisyones temporales o tienen vitrinas fiksas aviertas en salas espesyales kon egzemplos de ovras valiozas de vidriyo klasiko i moderno. Munchas de las fraguas modernas de muestra era se están konstruyendo de vidriyo. Los interiores de las kazas tienen muncha vidriyera i mobles luksuozos de vidriyo ke son muy apresiyados. El vidriyo konosyo su nasimyento en Misraim i Mezopotamya. Los Fenisyos en los anyos 2.500 A.M.E. (Antes de Muestra Era), empleyaron el vidrio echo a mano. Los primeros objetos de vidriyo eran los bondjukes dekorativos i los kolyes. La rikeza en la vida diyarya se apresiava kon objetos luksuozos de vidriyo. Los kazamyentos los mas importantes se aziyan kon los maestros de vidrio. Las famiyas rikas de la noblesa siempre esperavan de topar un yerno vidriyero. En Italya, la Izla de Murano es el lugar ke dainda es famozo por el arte de vidriyo. Asta vijitas turistikas espesyales se azen a esta Izla para dar a konoser i valorizar el arte de vidriyo.
Ay también una eksperiyensa interesante de yenar los vazos kon agua a un sierto nivel i topar el ritmo egzakto de las notas de muzika. En la antiguedad aviya vazikos chikitikos de vidriyo para guardar las lagrimas i todaviya en muestros diyas vijitando siertos muzeos estos vazikos se pueden ver. Oguro a todas i todos de tener una vida sin tristezas i vazikos siempre yenos de vino por diyas i noches de alegriyas.
