Oy, Alhad el 28 de Mayo 2023 mos fuimos a votar por la sigunda vez para elijir el muevo Prezidente de la Republika.
Al pareser, ay una grande partisipasyon komo uvo en el primer torno. Disheron ke era komo 90%, un shifro ke no se ve en el mundo entero. Muestro payiz tiene un pasado gloryozo en la demokrasiya. Komo savemos semos el primer payiz en el mundo ke dyo el derecho de votar a las mujeres.
Es la primera vez ke tuvimos este modo de eleksyon de dos tornos. Komo en el primer torno dingunos de los partidos no pudieron obtener la majorita, los dos primeros kandidatos kedaron al sigun torno. Ansina tuvimos de votar para eskojer uno de estos dos kandidatos. El prezidente aktual i el lider del partido Halk. Arogaremos ke gane el ke sera mas “hayirli” para el estado i ke los anyos vinien seyan una peryoda de kalmo i abundansya para el payiz entero. El Dio ke de fuersa i reushita a el ke va vinir al poder. No es kolay. Ay munchos problemes, sovre todo la kestion de los emigrantes i el estado jeopolitiko de muestro payis.
Malorozamente el mundo entero esta buyendo. No egziste un payis ke no tenga sehoras. Muestro mundo esta biviendo una epoka de trokamiento. Los ke ya kumplieron una grande partida de sus vidas no tuvieron repozo fin agora. A lo manko ke los mas mansevos tengan mas repozo ke mozotros porke ya lo meresen. De verdad ke la mueva jenerasyon, yamada “Z”, es muncho mas enstruida, edukada i adelantada de sus paryentes.
No kero eskapar sin mensyonar un poko la karestiya ke tenemos. Todo esta pujando de diya en diya. Arogaremos ke el governo muevo tome las mezuras ekonomikas para enderechar esta kestiyon muy emportante.
Viniendo otra una vez a las eleksyones, las medias estan diziyendo ke visto la simplisidad del voto de oy, los rezultados van a salir mas presto i kreyo verso la fin del diya ya vamos a saver ken va ser muestro muevo prezidente.
Hayirli i ugurli ke mos seya.
