La semana pasada vijiti el muzeo de “PERA” ande aviya una
egzibisyon sovre “Estambol de al Tyempo”.
Estambol es la kaza de los emigrantes. En las avenidas, en las kayes, en el vapor, en el metro, en la vida estamos entornados de grupos de differentes kulturas i jeografias ke no puedemos inyorar en dinguna parte. Las gerras, las difikuldades ekonomikas, las presyones politikas, las epidemias i el klima ke se esta trokando kada punto, en estos sujetos la emigrasyon es una posibilidad serkana agora para kada uno de mozotros.
Estambol se troko enteramente de los anyos 2000 fina oy, de la kavesa al pye. La diferensya de klasa entre las personas, los rikos i los povres se separaron kompletamente. Los distriktos “Beyoğlu”, “Karaköy” se derrokaron i se
rekonstruizaron para los turistos.
Estambol es una sivdad eksepsyonal ke kontyene munchas personas de la Anatolia i de munchas sivdades del mundo entero.
Oy en la Turkiya ay, kaji 15 miliones de emigrantes ke la mitad esta en Estambol.
“Estambol de al Tyempo” es una ekspozisyon de fotografias ke esta formada por la esperansa de krear una perspektiva kreativa i innovadora, uniendo la visualidad.
“Refik Akyüz” i “Serdar Darendeliler” son los kuratores de esta egzibisyon ke kontyene syete akademisyenes, onze fotografos, investigadores, ombres literaryos ke enrikesyeron esta egzibisyon kon sus lavoros presyozos.
Se kreo de munchos sujetos, temas prensipales.
Estas temas son: La sivdad entornada de soledades, de misteryos, los dyez anyos de alkavo, los problemes de los emigrantes i otros diversos sujetos.
La sivdad de los artistos mos esta deskrivyendo las kozas raras abituales ke enkontramos en las kayes de Estambol.
Eskrito por un grupo de eskritores ke envestigan, pensan i produizan sovre Estambol, estan trayendo otro punto de vista emportante tanto a la ekspozisyon, tanto al katalogo de la ekspozisyon.
