Duspues del establesimyento de la Republika Turka, Atatürk se metyo a azer reformas en el payiz. El se konsantro en la modernizasyon del payiz bazandose en los modeles evropeos. Sus planos sovre la edukasyon Turka avriyo el kamino a grandes reformas en las universidades.
El ministro de echos eksteryores se adreso a la Almanya. El governo turko estava pronto a angajarse kon profesores almanes sin konsiderar sus reljyones. Su buto era organizar un program de reformas en las universidades. El Gestapo peno muncho para impedir la partisyon de los profesores judyos ma el governo turko reusho a azer un akordo kon estos profesores.
Duspues de la muerte de Atatürk, su suksesor, İsmet İnönü kontinuo su politika. El governo turko sinyo kontrates kon munchos profesores judyos almanes i aksepto a pagarles buenas mezadas. Los primeros anyos estos profesores ensenyaron en sus linguas nativas kon traduktores, ma duspues del kuatren anyo, eyos deviyan de ansenyar en turko.
El 18 November 1933, la Grande Asambleya Nasyonal kito una ley i ramplaso la vyeja eskola, Darülfünun, kon la mueva, Istanbul Üniversitesi.
Kon la edukasyon de los profesores, la mueva universidad, en poko tyempo, se izo uno de los mas grandes sentros de edukasyon i de investigasion de Evropa.
Se fondo fakultades de Linguas, Istorya, Jeografiya, Ley i Agrikultura.
Munchos de los sientifikos se fueron a Ankara, i fondaron fakultades de arte, muzika, i medikeriya. El arshitekto ekspulsado, Clemens Holmeister, ayudo a fraguar los edifisyos de la Grande Asambleya Nasyonal i el professor Paul Hindemit, el edifisyo de la opera i el teatro del Estado.
En 1935, duspues de las leyes de Nuremberg, los bibliyotekaryos fueron forsados a abandonar sus karyeras.
Estos bibliyotekaryos aplikaron un kurso de tres mezes en las libreriyas. Izyeron adelantar el sistem de libreriya en dando lekturas en las provansas, en establisando muevas institusyones i en publikando periodikos sientifikos. La majoridad de estos kursos se estavan dando en las fakultades de medisina, matematika, siensya natural, siensya judika i Arte.
Mas o menos dozyentos profesores fuyeron de Almanya, los syen de eyos eran judyos.
Estos profesores kontribuaron a la organizasyon del sistem evropeo en las universidades turkas. Eyos lavoraron kon muncha kerensya, se ambezaron en turko, tuvyeron amigos turkos, i ansi fondaron pontes entre el oryente i el oksidente. Munchos dentre eyos se fueron a Los Estados Unidos, unos kuantos resivyeron la identidad turka, profesor Hirsch syendo uno de estos. Albert Einstein les ayudo muncho a fuyirsen de Almanya.
Akeyos diyas, diziyan ke la universidad de Estanbol era la mijor universidad almana fondada afuera de Almanya.
