No so turisto, so viyajador. Son muy diferentes kozas. Mis amigos kuando se van a una sivdad mueva, me pruntan, si la konosko, les digo ande pueden kaminar, ande estan las mas enteresantes kalejas, i muzeos, o restorantes. Kuando les ago programes a los amigos me gusta muncho, porke me akodro los diyas ke pasi aya en el viyaje, i ago nostaljiya. Fin agora mos fuimos a los Continent'es a Evropa, a la Asia, al norte i sud Amerika, i a la Afrika. Asta oy kaminimos 35 pais i 110 sivdades. Semos un grupo de 45-50 amigos ke mos gusta konoser kulturas muevas. El nombre del grupo es BTS (Bir Tutkudur Seyahat) kere dizir "viajar es una pasion". Si me demandash ande mas muncho te gusta o te gusto mas muncho de konoser vos digo ke New York es numero uno. Aya biven personas del mundo entero. Todo modo de kulturas puedesh topar ayi. Ay vizinos Italyanos, Chinos, Gregos, i tambien Judios. Estos son unos kuantos ke me vino al tino ensupito. Ansi ay munchos puevlos i kulturas ke biven en N.Y. En las maalles kada puevlo bive kon su kultura. Kuando te vas ayi di ke parese ke estas en la China o en Italya o en Tel Aviv. Es muy enteresante.
Lasigunda sivdad ke me gusta vijitar es Paris. Kuando me vo a Paris, ayi me gusta la gastronomiya, la lingua ermoza, i tambien la musika, i la djente ke son muy delikadas. La sivdad bive 24 oras. Las kayes son siempre muy bivas. El treser paiz es las sivdades de Espanya, muy lindo. Kuando me vo a Espanya me konsyento ke esto en mi kaza. La kultura, la lingua, la djente son muy serka a muestra kultura. Vash a dizir ke ya paso mas de 500 anyos, ama oy en diya estamos bivyendo kon las kulturas ke trayimos kon mozotros. El norte de la Evropa es otra kultura, i la kultura de las sivdades del Mediterano son otras. A mi me gusta de irme a las islas de la Gresia. Me gusta gostar las mezes, me gusta la lingua i la musika. El bayle de Sirtaki i el Buzuki. Un diya kero kontarvos solo las izlas de Gresia, ande topo mi repozo.
La Asia es muy enteresante. La kultura de Buda i de los Hindus. La kultura de Berberis kon ken mos enkontrimos en Marroco era muy enteresante. En el sud de Amerika mos fuimos a Argentina, Uruguay i a Brasil. Las Cataratas de Iguazu mos enkanto. I mas de esto mos gusta viyajar en "Cruise". El viyaje ke se aze kon Cruise es el mas relaksante. En una ves te puedes irte a 4 o 5 sivdades. No ay avrir i serrar las validjas, no ay trokar de oteles. Kuando te embarkas al Cruise 7-8 dias komes, beves, te engleneyas i tambiyen vijitas unas kuantas sivdades i te enkontras kon kulturas diferentes.
Si keresh meldar i anbezar los lugares ande mos fuimos i kaminimos, puedesh vijitar el blog ke esta en el google ke se yama btseyahat.com.
