Los diyas pasan kon la rapidez de un reflo. Kaji sin apersivirmos el sol nase, se echa, i los anyos se adjuntan. La noche es el momento de la oskuridad. En muestros diyas tenemos la elektrisidad i todos los medyos para pasar un buen tyempo. La televizyon, la radio, los sinemas, los teatros, los klubes, los restoranes i todas las fasilidades para pasar nochadas agradables. Los amigos se reúnen en sus kazas i konversasyones de todo tipo se pratikan kon amistad.
A los ke les plaze djugar kartas ya tienen diyas i noches bien kumplidas. Para los ke no se keren mover de kaza oy en diya ay la fasilidad de la vizyon para avlar por el teléfono móbil i konversar kon kualkier payis del mundo debaldez.
En los siglos pasados la djente se organizavan kon el oraryo de la natura. Esto no les kavzo dingun obstakulo i realizaron ovras maraviyozas ke oy yamamos ovras klasikas. Ke pasensya i perseverensya para lavorar kon ardor sin medyos favorables komo los de oy. Una kandelika les abastava para eskrivir epopeas, ovras de teatro, realizar trajedias, komediyas inolvidables i para eskulptar splendidas estatuas estetikas.
La kreasyon no les mankava para lavorar noches enteras en el friyo i munchas vezes kon la sufriensa de la ambre.
I ke dizir para el amorozo ke no alkansa a su donzeya i se konvierte a un alokeyado. El mizmo es una trajediya, i bive kaji komo una sombra invizible entre la djente. Ansi, “El tyempo kura las kozas i traye las rozas”.
Savemos ke “Dar tiempo al tiempo” es dizir aprovechar del tiempo kon meoyo, ser sezudo, moderado ama sin deshar pasar un segundo inutilmente i no olvidar ke “El tiempo es kaji oro ke vale el syelo” i “Kon el tyempo i pasensya se gana la syensya”.
Por fin, “Tiempo prezente es un segundo, lo demás o es pasado o será futuro”.
