La djente ajena ke estavan kon los ijos de Israel (Erev Rav) dezearon munchas kozas sin menester. Kozas ke no se puediyan topar mas ke en las sivdades povladas i no en el dizyerto. El puevlo de Israel sin apartar la diferensya ke ay de eyos a esta djente, i eyos yoraron dizyendo: Ken nos dara a komer karne? I empesaron a rekordar de munchas kozas de muy poka emportansa ke teniyan en Ayifto debaldes. Myentres ke el mantenimyento ke teniyan en la mano ke era la magna, era una koza muy estimado en su savor i en su vista, en su limpyeza, ke en tenyendo esto en la mano, no kaliya pensar por unas kozas de muy poka emportansa.
El puevlo se arekojeron en la puerta de su tyenda, famiyas enteras a yorar por este mal, ke les mankava todas estas kozas ke teniyan en Misrayim en abondansa. Este konporto de la djente le desplazyo muncho a el Kriyador komo se olvidaron tan presto todas sus buendades. Moshe Rabenu se topa en un estado de no pueder azer nada, el pensava ke la kulpa estava en el ke no esta savyendo giyar a el puevlo. El se kesha kon el Todo Poderozo dizyendo: ke pekado tuve ke me dates este karga tan pezgada a no pueder suportar. De onde tengo yo karne para dar a komer a este suma de puevlo ke estan yorando dizyendo: Damos karne! Moshe Rabenu rogo a el Kriyador ke si lo kere byen ke lo mate i no vera esto mas, ke no puede suportarlo. El Kriyador le dize a Moshe Rabenu ke por endelantre no va tener el esta kantidad de yugo kon el puevlo. Le enkomendo ke eskojga 70 personas de los savyos de Israel ke son konpetentes de giyar a el puevlo. El Kriyador les va dar la fuersa ke rijgan a el puevlo i le van a alivyanar el yugo de Moshe Rabenu. Le diras a el puevlo le dize el Kriyador, ke se apronten para manyana i komeran karne en abondansa. Tendran de komer fin a un mez. Ma ke sepan ke esto komo les va salir de la nariz i antes de eskapar de komerlo van a murir munchos de entre eyos.
Moshe Rabenu vyendo ke esta dadiva de la karne va ser por el mal del puevlo, le rogo a el Kriyador de arepintirse de esto dizyendo, una vez ke esta es unas venedades del puevlo, eyos keren topar unos pretekstos.
Moshe Rabenu konto a el puevlo ke el Kriyador ordena de eskojer 70 personas de los savyos del puevlo de los mas pertenesyentes de todas. Los aparo a el deredor del Mishkan. El Kriyador lo favorizo, i pozo sovre eyos su pofetiziya.
Entre las personas ke fueron eskojidos para esta misyon, aviya dos personas nombrados el Dad i Medd, los kualos kedaron en el real del puevlo i no fueron delantre del mishkan komo las otras 70 personas. Estos dos personajes ke no les salyo el goral, por esto kedaron en el real i no fueron metidos delantre el mishkan. Fueron profetizando, Moshe Rabenu fue avizado de parte su elevo, Yeoshua ke estan profetizando en el real. El responde dizyendo: Ken dyera ke todo el puevlo fueron profetas komo estos.
El Kriyador izo arankar de la mar unas syertas aves nombradas selav. Tanto era la muchidumbre ke se espandyo a el deredor de el real. El puevlo estuvo rekojendo dos diyas i una noche. Malorazamente ke este Selav fue por el mal del puevlo. Ainda tenyendo la karne el los dyentes mando el Kriyador una mortaldad. En el entarvalo de un mez muryeron muncha djente del puevlo. Por esta razon se yamo este lugar Kivrot Atarva - Tombas de el Dezeo.
