“Kazamentera, Kazamentera / Mira tu livro / I topame un kompanyero perfekto…” (Del famozo filmo El violinisto en el tejado).
Kon la proliferasyon jeneral de sitios en el internet, la idea de un shadhan, un kazamentero o una kazamentera, vyene komo un uzo, una tradisyon arkaika i primitiva para la mayoría de los Djudios modernos (kon la eksepsyon de las komunidades ultra o moderadas relijyozas). En todo kavzo, asta en un tyempo non-leshano, el shadhan teniya un posto importante en la vida Djudia, i en munchos enturajes tradisyonales oy en dia lo tyene.
Alguno/alguna ke es bekiar, o alguno/alguna ke se akodra de la vida antes de enkontrar su persona spesyal, su kompanyero spiritual admitira ke enkontar el kompanyero/la kompanyera apropyada “no es fasil”. Este sentimyento no es muevo. De fakto, desde los tyempos del Talmud (i siguro antes de estos tyempos), la djente avlavan de la difikultad de enkontrar un o una kompanyero/ kompanyera. Rabbah bar Channah disho en el nombre del Rabbi Yochanan: “Es tan difisil de topar los kuples apropyados es komo avrir la Mar Kolorada!” (Talmud, Sanedrín 22a).
De otra parte, el Midrash mos konta la istorya de una matrona romana ke adjunto a mil esklavos kon mil esklavas para amostrar ke akuplar no es tan difisil. A la demanyana, batyendo i firyendo i kon lagrimas, todos le suplikaron ke los liberen de esta desizyon matrimonyal.
Una de las fonskyones importantes de un shadchan es de aminguar, enchikeser el kampo de djugo! Despues de munchas entrevistas, el shadhan tyene una buena idea de lo ke el ombre i la mujer pueden estar bushkando i, bazandose en estas empresyones, va poder propozar uno o una posivle kompanyero o kompanyera. (En los enturajes mas tradisyonales, los kriteryos en jeneral, los establesen los paryentes, la madre i el padre).
Un shadhan tambyen esta aya para giar el kupl para ke se konoskan mas mijor, para ayudarlos a ver las mijores kalidades del partner.
Achakes ke el shadhan fasilita un evento tan importante en la vida de una persona (a saver el matrimonyo), se konsidera pagar una suma adekuada al shadhan por su tyempo i esforsos. Komo minimo, uno deve darle al kazamentero / kazamentera un regalo sinyifikativo. De otra parte, kero akodrarvos ke por syertos, el dover de un shadhan se konta komo una mitzva.
Vash a a demandar de ande me vino al tino, en 2023, ke vos eskrivi sovre los kazamanteros? La repuesta es fasil: ayer la noche por la “n” vez miri el filmo “The Fiddler on the Roof” despues de la muerte del famozo aktor, Haim Topol, z"l.
