Si los mansevos saviyan i si los viejos puediyan es un dicho muy djusto. A vezes afita ke kozas simples ke se keren realizar por djente aedada les sale muy komplikado para akumplirlos.
Munchas vezes los mansevos deshan para despues lo ke puediyan azer al momento. Los ke salen a la kaye poko i no pueden azer kaminadas en ayre libre por kondisyones malas de salud, para tener el moral alto pueden inventar kozikas simples ke azen pasar el tiempo en buen umor. Trokar el ambiente de la kaza es primordial. Avrir los perdes para ke entre la luz del diya i un poko de sol traye alegriya. Evitando el kurander, el aver fresko traye un reflo riko. De vez en kuando meter a la meza un mantel muevo ke esta guadrado en los kashones por diyas espesyales mos da un grande plazer. Empleyar unas kupas diferentes, pirones, kucharas, kuchiyos ke eyos también están enfasyados de estar enserrados en las vitrinas es un gusto grande. Entrar al salon i empleyar la meza sin esperar musafires, meter kandelikas ke se dezesperan asta ke van a yegar los diyas de aniversaryos i fiestas o Shabat es también un trokamyento. Los vazos ke esperan de ser adornados de flores se enfasyan de kedar vaziyos i solikos. Antes era muy de moda el famozo vidriyo de la sivdad de Murano en Italya. Vazikos chikos de kolores alegres ke achileyan las alas del korason se pueden empleyar para la dekorasyon interyor.
Los Japonezes konosen muy bien el arte de dekorar flores i este arte se yama Ikebana. Ikebana ekspresa todos sus sentimientos kon la manera de instalar kada flor i flor en formas muy diferentes. Ikebana es un arte milenaryo ke simboliza la vida de los Japonezes. Oy en diya el komersyo de las flores artifisyales se industrializo i se eksporta a todas las partes del mundo. Las están fabrikando de una manera tan ermoza ke kaji paresen naturales. Estas flores están también perfumadas kon golores tan suave ke es difisil de diferensyarlas kon las verdaderas. Munchas eskolas de arte i kursos ensenyan también a los elevos komo azer flores sentetikas kon telas de kolores i instrumentos livyanos para formar ojas i ramas paresidas a las orijinales.
Kantar tambyén es una terapiya i sintir muzika es un regalo al puerpo. Alegra el meoyo, repoza el korason i deskansa la alma. A kada uno su tipo de muzika i la muzika traye una majia al entorno. Toda muzika tiene su ritmo espesyal i kada uno a su gusto personal topa su melodiya. Azer esforsos para la jimnastika diarya viene un poko pezgado i es bastante difisil de realizarlo. La persona lo toma komo un pezgo i topa achakes para renunsyar. Ama ay remedyo para todo. Ken dira no a un bayle livyano kon una muzika dulse i un ritmo alegre ke es una jimnastika manyifika. Para los aedados dando pasos ande están sentados no es komplikado. Topando un ritmo trankilo, moviendo las manos, los ombros, la kavesa es ser kontente i la sonriza de alegriya akompanya toda la alma. Para los ke pueden meldar sin difikultad, klaro kon o sin antojos, los livros, las gazetas, los periodikos son un mundo intelektual sin fin. Los ke pintan, los ke eskriven, los ke brodan, los ke kuzen, pasan el tiempo kon muncha savor. Los amantes de rezolver las palavras kruzadas se pierden en un mundo diferente. Djugar al Satranch kon un amigo o amiga, i el djugo de Tavli ya es un pasatyempo agradable. Por los ke aman kartas, ni avlar. Pueden pasar oras i oras sin apersivirsen del tiempo ke paso. Ademas komo ay siempre tratamyentos savrozos es lo mijor del diya. Platizikos de vez a kuando es la sal i pimyenta mizmo a los ke se yaman "amigos para siempre".
Kada edad tiene su gusto i su estetika. Bivir en salud buena, en paz i ser orozos es primordial. Leshos de mala ora i siempre haberes alegres.
