El mundo entero estava asperando kon grande entereso esta boda. El ijo del rey de Jordania, Hüseyin, se kazo esta semana. Una boda granduoza i luksyoza. No se kere dicho ke todas las famiyas royalas del mundo estavan prezente en esta boda. Todos los envitados estavan vistidos muy elegantes i shik. Kreyo ke esta boda va tener muncho de kontar mezes i anyos. Puedemos dizir ke los mizmos envitados ke asistieron a la koronasyon del Rey Charles III de la Ingleterra, estavan prezentes en esta boda. Todos estavan endjuntos en Amman. La novya del ijo del Rey es Rajwa Al Saif de Arabia Saudia.
El kazamiento se izo en el palasio Zahran ke se topa en Amman i despues todos se fueron al otro palasio Al Husseiniya para asistir al pranso.
El Rey Huseyin i la reyna Rania tuvieron una sigunda alegriya este anyo, porke en Marso pasado se aviya kazado la ija grande, la prensesa Iman kon Jemil Termiotis de Gresya.
Entre los famozos envitados nobles, se topavan el Prens de Galles William i su mujer, la Prensesa de Galles, Catherine. Eyos vinieron a Amman un diya antes de la boda, kon un avion privado. En fakto, Amman muy bien konosido por Catherine, porke su padre lavorava en el buro de Amman de British Airways. Ansina bivyeron la famiya entera durante munchos anyos en Amman. Mizmo el anyo pasado, William i Kate Middleton se fueron a Amman i una foto ke tomaron en una fin de semana, la izieron karta de Noel.
La noche pasada se fiesto la “Noche de Henna” rituala. La prensesa entro mano kon mano kon la reyna Rania. Un poko riyendo, un poko yorando aresivyeron a los envitados i despues la reyna Rania izo un deskorso ke emosyono a todos los envitados. La prensesa Rajwa vistiya un fostan tradisyonal entero brodado kon oro i la reyna vistiya un fostan blu. Noche entera aviya una orkestra ke izo una muzika de las kansyones lokalas de Jordania, para alegrar a los envitados. En mizmo tiempo un grupo de folklor estava baylando.
Los envitados royales eran: El prens Frederik de Danimarka kon su mujer, Mary, la prensesa Japoneza, Hisako i el prens Tsugoko, el rey de Hollanda, Wilhelm Aleksander i su mujer, la reyna Maksima i su ija grande, la prensesa Amalia, la prensesa Victoria de la Sueda kon su marido, Daniel, el prens de la Norvejia Haakon kon la prensesa Matte Marit i otros.
La prensesa de Galles, Catherine vistiya un fostan desinado i kuzido por una kaza de moda muy famoza de Elie Saab del Libano.
En entrando al salon ande se izo la boda, Rajwa entro kon el ermano de su futuro marido.
Agora se va azer una sigunda boda en la izla Sardinya, ande uvo munchas demonstrasyones kontra los aparejos para la boda, en pretendiendo ke izieron danyo a la natura.
A mozotros mos keda de dizir “eyos tengan bien i mozotros tanbien”.
