En el anyo 2019, la mizma epoka, en el mez de junyo estava en Barcelona para la Ekspozision ITMA ke es una de las mas grandes eksposisiones. Es sovre las makinas de tekstil del mundo entero. Es organizada por los industriales Evropeos de makinas de tekstil.
Este anyo esta ekspozision tomo lugar en Milano, en Italia. El pais ke fue el mas tokado por el Covid. Miles i miles de djente toparon la muerte en los koridores de los ospitales, en las kayes… Reelmente fue una desgrasya para los Italianos.
La semana pasada estava en Italia en Milano para una mueva ekspozision de ITMA. Kreo ke la grande partida de los Italianos se olvidaron de lo ke bivyeron los dos o tres anyos dalkavo. En la kaye, en la ekspozision avia puedeser unas kuantas personas kon karatula. Avia un konduktor de tramway kon karatula…
En la kaye ke alkilimos un airbnb avia un lugar ande los mansevos se estavan engleneando asta las 3 de la demanyana. I dospues al kebapchi turko ke se topava djusto en frente de muestra kaza. I estavan avlando, gritando asta las 4 o 5 de la demanyana. Dishe Bendicho el Dyo ke mos dyo la kapasidad de pueder olvidar. I esta vez kreo ke reushimos a pasar esta kriza de Covid
Esto no fue solo para la Italia. En esta ekspozision avia a lo manko 150.000 personas del ofisio de 60 diferentes payises ke salyeron de sus payis i vinyeron a vijitar esta ekspozision; i kreo sin dingun espanto de Covid.
