El otro diya en bushkando un dosye en un kashon me vino a la mano dos kartikas emprimadas en fransez i me sinti anyos antes kaminando kon mi marido, ke este en Gan Eden en la famoza Avenue des Champs Elysées. Estavamos mirando kon plazer sus kafes i magazenes iluminados. La persona ke se va 1000 vezes mizmo a Paris toma siempre un plazer muevo de pasar un ermozo tiempo en esta sivdad “La Ville Lumiere”.
En supito una muzika de bando militaryo vino a muestras orejas. Saviendo ke no ay dinguna fiesta en estas datas demandi al entorno, i me disheron ke a epokas fiksas ay seremoniyas de asender la flama en la “Place de l’Etoile” a la memorya del “Soldat Inconnu” (el soldado deskonosido). Mos asentimos en un banko i ampesimos a ver pasar grupos militaryos i otros, kada uno kon su bandiera o su flama. Despues de kaje una ora la muzika kedo i todos los grupos pasaron al repozo abashando sus bandieras.
Delantre de mozotros djusto, una mujer kon una kipa blanka i blu i una bandiera ande me paresyo ver karakteres ebraikos. Kon kuriozidad abashi del trotuar i me fui verso eya i sin pensar muncho, le dishe “Shalom”. Eya me miro dos puntos enkantada i me respondyo “Shalom” de mizmo. “Kualo reprezentash?” le demandi. Eya espandiendo la bandiera ande estava eskrito estos biervos “Les rescapes du Vel D’Hiver”. Komo mirava yo estos biervos sin entender, eya en kurtos puntos me konto una de las trajediyas dezgrasyadas de la Sigunda Gerra Mondiala. En Julio 1942, la polisiya franseza arekojo miles de kriyaturas judiyas, mizmo bebikos kriyando i los enserro en un grande stadyum de Paris, “Le Velodrome d’Hiver”. Aya kuantos de eyos se muryeron de ambiertura i sufriyensa, kuantos fueron deportados a los kampos de konsentrasyon i unos kuantos parvinieron a salvarsen. Konti esta trajediya a muestros ermanos de Estanbol ke no la konosiyan, me disho eya i me dyo dos kartonikos al nombre del Vel d’Hiver. Antes de espartirmos las lagrimas me koryeron de los ojos, yo era chika en el tiempo de la gerra i no konosiya esta trajediya. Le demandi si eya era la prezidente de esta organizasyon de los desendientes ke se salvaron del Vel D’Hiver. “No” me respondyo, “Es mi marido”. Viendo mi enkanto me yevo dos metros mas leshos, ande en una araba estava asentado un ombre kon una mantika en sus piernas. “Este es mi marido, te lo prezento, no puede kaminar, los alemanes le rompieron las pachas. I una relijioza lo eskondyo debasho sus fustas i lo salvo. Pishin tornimos al otel, Paris aviya pedrido a muestros ojos su grasya i ermozura. Fransya, payis de los derechos umanos, de la libertad, igualdad i fraternitad. Verguensas a ti!
Dos diyas despues de este enkontro oyimos en la televizyon ke un grupo de M. LePen aviya rompido la plaka de komemorasyon de la puerta del Vel D’Hiver.
La trajediya del antisemitizmo es siempre biva. Kreyo ke no ay de menester de kontinuar mas, keridos amigos.
