Miklos Voglhut nasyo en el anyo 1898, en una famiya judiya ande los myembros eran todos artistos. Milkos, kuando era mansevo, kijo azer una karyera enriva de muzika i de teatro. Su ermano era klarnetisto i saksofonisto. Su sovrino era un muziko famozo de jazz. Miklos, en poko tyempo, se izo famozo, ma en el anyo 1924, un grande antisemitizmo empeso en Ungriya i en Evropa. Miklos fue ovligado de trokar su nombre. Tomo un nombre mas ungaro, i se izo Miklos Vig. La sinyifikasyon de Vig en Ungaro es alegre.
Miklos Vig estudyo en Geza Boross. Dezso Gyarfas i Antal Nyaray deskuvriyeron su talento, i lo tomaron para ke lavore en el Intim Kabare komo solisto, i mas duspues, lavoro en otros kabares komo Budapest Operetta Theater i Budapest Orfeum. Mezmo ke kito munchas plakas, Miklos Vig se izo mas famozo en la radyo, komo kantante de muzika popular. Un artikolo del anyo 1935, en la revista Szinhazi Elet, eskrivyo ke Miklos fue mas renomado komo un kantante de kantikas sentimentales populares.
Segun la revista ungara de jazz i muzika klasika, Gramofon, Miklos fue un grande muziko ungaro. Miklos kanto i baylo en diversos kabares en los anyos 1920s.
En el invyerno de 1944, mezmo ke no teniya un nombre judyo, i ke se aviya kazado kon la ija de una famiya katolika, los nazis lo tomaron i se lo yevaron kon otros del getto. Les disheron de dezmudarsen enfrente del riyo Danubio.
Los nazis tiraron los fuziles por detras, los mataron a todos los prizonyeros, i duspues, dezmudos los acharon al riyo. Esto lo izieron munchas vezes en los anyos 1944-1945 en Budapest. El diplomato Raoul Wallenberg reusho a salvar munchos judyos de este destino terivle, ma malorozamente i munchos muryeron.
Los eskultores Gyula Pauer i Can Togay izyeron eskulturas de los kalsados de las viktimas, i los plasaron djusto en frente del manyifiko edifisyo del Parlamento en el bodre del riyo. Los vijitadores ke vyenen aya, ven sesenta pares de kalsados echos de fyerro. Los kalsados de kreaturas, mujeres, i ombres estan amostrando ke dingunos no pudyeron salvarsen de la brutalidad del Olokosto. Detras de la eskultura, ay un banko de pyedra de kuarenta metros de largor, i un metro de altura, ande en las tres puntas, ay sinyos de fyerro enriva de los kualos, esta eskrito un teksto en ungaro, ingles, i ebreo: “A la memorya de las viktimas ke desparesyeron en el riyo Danubio, ande los milises Arrow Cross los echaron, en los anyos 1944-45. Las eskulturas fueron kreadas en el 16 de avril del anyo 2005."
En una vijita al monumento de los kalsados, puedesh ver los paryentes de las viktimas, metyendo rozas, o kandelas para onorar las viktimas ke dyeron sus vidas. En el areskuro de la noche, kon la splendor de las kandelas i de la luna, la eskultura reprezenta un imaje muy diferente de la soledad.
Kale estar un punto allado de estos kalsados, i pensar ke karar de mazalozos semos.
