Ke komida savroza es echo de garvansos machukados, i en jeneral es servido kon diversas salatas i se konsidera komo una alternativa de meze sano? Kreygo ya entenditesh: Falafel.
El 12 de Junio era el dia enternasyonal de Falafel!
Los istoryanos del falafel no estan seguros de los orijines del falafel. Munchos asosyan sus empesijos kon los koptos (Kristianos de Ejipto) ke kaji unos mil anyos lo komiyan al lugar de karne durante el periodo kristiyano de 46 dias de taanit. Otras spekulasyones dizen ke se komiya durante los tyempos de los faraones, una era muncho mas antigua. Algunos pensan ke el falafel se invento en el este de Asia, spesifikamente en la India, ande la kultura de las frituras aviya empesado desde tyempos leshanos. Etimolojikamente, algunos apuntan a la asosiyasyon de la palavra falafel kon el byervo arameo/arabo/ebreo “pilpal”, ke sinyifika una koza chika i redonda, o un semyente de pimyenta. En Persiano “pilpil” sinyifika pimyenton largo. Un diksiyonaryo Kopto sita la fraza “pha la fel”, ke sinyifika “tyene munchas fasulyas”. El Oxford English Dictionary inkluyo por primera vez la palavra "falafel" en 1951.
Es difisil identifikar la komida djudia o la muzika djudia, porke la mayoría de la komida i la muzika djudia se derivan de las kulturas de la diaspora ande bivyeron los Djudios. Aunke el falafel se konsidera la komida nasyonal de Israel (i de Ejipto), se save ke provyene de la kultura kulinarya de los paizes del Medyo Oriente ande biyeron los Djudios. Achakes ke el falafel es de orijin vejetal, se konsidera komo parve (ni karne ni leche) en la ley djudia i se puede komer kon kualkier komida. De esta manera, es bastante apropriyado para ser konsiderado komo un alimento nasyonal de una nasyon djudia.
Los restoranes de komida presto (fast food) kosher de Amerika del Norte estan sirvyendo el falafel en sus menus durante dekadas, ma desde la dekada de 1970, el falafel se topo un kamino en el merkado de la Amerika del Norte prinsipalmente achakes de la komersyalizasyon de la marka Israelyana Sabra, i syempre esta disponivle komo komidas de kayes i restoranes vejetarianos al nivel nasyonal. En mizmo tyempo, el falafel se izo muy popular en Alemanya, no solo en la grande komunidad araba de Berlín, sino tambyen en la povlasyon almana propya. Ma puedo dizir ke en Estanbol, “no izo una situasyon”!
Keres azer falafel? Esto es la resefta ke topi i kopyi de un livro de komidas del medio oriente. Toma los garvansos krudos (si los gizas antes se van a despedasar i deshalos en la agua durante una noche. Algunos mesklan una piska de karbonato. Eskurre i mole los garvanzos djunto kon algunas espesias (los mas populares son prishil, sevoya vedre molinado, ajo, kishnish i kimyon). La meskla se forma en chikas bolas i despues se friyen. Las bolas se meten en una pita (un modo de pan chiko aplanado kon una vaziyura en medyo), se adjunta diversas salatas, i syertas garnitures komo tehina o hummus.
Bon appétit, afiyet olsun, be’teavon!
