Kuando tanye una muzika, mos vyene al tino pasar tyempo, englenear, kantikas, u byen notas, ritmos. Por tanto la muzika no es solo esto. La muzika es una armoniya ke da a la persona una ermoza aktividad. Por esto dizen ke la muzika es el mantenimyento de la alma. Por egzempyo un diya ke estamos un poko inyervozos, tristes u dezesperados sintir una muzika ermoza mos kalma.
Efektivamente para munchas hazinuras de inyervos es melizina. Munchos doktores, antes de entrar a una operasyon meten una muzika klasika para ke el hazino se kalme. Una kantika konta las ansyas, la alegriya, el amor i otra los penseryos, los sintimyentos.
Yo me echo i me alevanto kon muzika. Tanto me plaze, ay kaji dyez anyos ke me vo a los kursos de muzika Turka.
La muzika Turka tyene una kultura muy profonda. Veramente ke no ay fin. Kon sus kompozitores, kon los tanyedores i sus enstrumentos, es un arte muy profondo. Sovretodo las kantikas vyejas tyenen unas sinyifikasyones fantastikas. Kompozadas por amores grandes, desepyones, alegriyas i ansyas.
La semana pasada tuve la shans de asistir a un viyaje muy enteresante.
El kurso ke kontinuo TAKSİM KLASİK TSM. DERNEĞİ, kon la kolaborasyon del koro Karahallı i su direktora SEZİN, organizaron una turne a UŞAK ande no pensava nunka de irme.
Fuimos envitados por el Prezidente de la Munisipalidad de Uşak. Sinkuenta i sinko almas fuimos aresividos komo reyes, en la enstalasyon de la Munisipalidad.
Uşak, una sivdad anturada de vedruras, rozas i yervas de kolores a kolores, un aver limpyo i puro. Las komidas muy savrozas, por siguro todo natural i organik.
El pasado istoriko, muy enteresante. Asigun mos konto el gid turistiko, esta sivdad tyene una istorya muy enteresante del tyempo de los Elenikos. I esto lo vimos en el muzeo ande mos yevaron el sigundo diya.
El konserto se realizo en UŞAK ATATÜRK KÜLTÜR MERKEZİ kon la partisipasyon de setesyentas personas. Kedimos kuryozos, komo la djente de esta sivdad da tanto emportansa a esta muzika. Todos kantando las kantikas kon mozos endjuntos i esto mos dyo un grande antuzyazmo.
Un grande remersimyento al prezidente de la Munisipalidad de Uşak, Mehmet Çakın, al organizator i prezidente de la fondasyon de edukasyon i kultura de Uşak Nafız Çavdar i al prezidente de la rejyon Hüseyin Reşit Öz.
Un grande remersimyento al direktor, profesör de muzika Turka i kantador del radyo Estanbol, İbrahim Suat Erbay.
Vos rekomendo de ir a ver esta sivdad ermoza.
