Oy, estamos koryendo de detras de muestras vidas para alkansar al dia. No estamos pudyendo ver kualo ay en el entorno. Estamos koryendo de un lugar al otro solo mirando sin ver. “Mirar” i “Ver” tyenen diferentes sinyifikasyones. “Mirar” es solo echar una vista o dar un ojo. “Ver” es mirar kon atansyon, dar emportansa a lo ke ay.
Yo oy en dia, kullaneo muncho el transporto Marmaray. Un dia ke tenia mas muncho tiempo sali del transporto al sielo de Sirkedji. Deke esto dizyendo “al sielo”, porke el treno Marmaray para ir a Sirkedji se esta indo debasho de la mar.
Empesi a kaminar aryento de la Gar. Estava kuryoza, kualo aviya, en los salones viejos. Marmaray es un treno muevo. Ama el Gar de Sirkedji es un lugar fraguado en 1872 i nombrado shemendefer del Rumeli. En vezes se serro. En los anyos 1955-2013 se kullaneo el tren para ir al banlio. Oy en dia, kada dia pasan 170.000 personas aryento de este Gar i no se si saven ke ay un muzeo chiko sovre la istorya de este lugar. Se yama “İstanbul Demiryolu Müzesi” El Muzeo Shmendefer de Estambol.” Kualo ay i no ay. Una istorya sovre el pasado. En 1961, Turkia izo un akordo kon la Alemanya sovre lavorantes. En el muzeo ay las validjas de estas personas, ay vistimyentas ke utilizaron los inspektores, los konduktores, los materiales ke kullaneavan los doktores de akel tiempo, los tefteres de kontabilita. “Facit”, makina de azer kuentos. Daktilos. Aya pasaron djudios para irsen a Ashkale kon baules de tavla. Ay fotografias. Un muzeo muy muy chiko ama debasho de este tejado ay una istorya muy ancha.
Kuando estava mirando a estos objektos me apersivi de los anyos durante de mi vida. Komo se troko en 50 anyos la vida.
Estos objektos ke estan agora en el muzeo yo los kullaneyi i agora se izyeron para muzeos. Este kadar de vieja me ize o este kadar de koryendo se troko el mundo? Aya aviya materyales de doktores, algujas en kutikos emaye ke se buyian para kada vez, antes de utilizar. En mi chikes era ansina. Agora ay plastikes ke se kulanean para una vez. Aviya makinas de Facit. Yo kuando estava en el lise, me estava indo a la botika de mi padre para lavorar i la kontabilite se aziya kon estos i tengo yo en kaza una de eya. Daktilos, en la eskola miya aviya leson de daktilo ke eskriviamos kon dyez dedos. Daktilo Remington. Telegrafos, mos ivamos a la posta para dar haber presto; el presto era tres diyas, agora ke esta kon los telefones elektronikos en un punto.
Vos konsejo de ir i pasar un poko de tiempo en est Gar. Vos konsejo de yevar a vuestros inyetos. El Gar de mi chikes tenia una golor freska, una golor diferente, mos ivamos a los banyos, plajes de Florya, Ataköy kon chantas yenas ke pasavamos de la demanyana temprano asta ke el sol desparese. Eran diyas kalmos. Agora es korrer i no alkansar a nada, koriendo, sin tomar savor de nada, para ser mas i mas presto. Vos konsejo un poko azer atansyon al deredor vuestro, i tomar un reflo kalmo para vuestra salud.
