Un ijiko torno de la eskola en yorando. La madre kon merikiya le demando la razon de sus yoros. El ijiko le disho a su madre ke la profesora lo arondjo de la klasa en dizyendole ke no venga mas. Poveretiko kontinuando a yorar le dyo a su madre un papeliko ke le mando la profesora. Aviyan solo 4 mezes desde ke ampeso la eskola El ijiko dainda no saviya meldar i eskrivir porke estava en la primera klasa.
La madre avriyo el papeliko i kon lagrimas le meldo lo ke aviya eskrito. “Estimada Sinyora, tu ijo siendo muy entelijente, esta muy adelantre de sus amigos de la klasa. Por esto te rogo de tomarlo de la eskola i enrejistrarlo en una eskola ke tiene mas alto nivel de edukasyon. Esto sigura ke va reushir muy bien en su vida. Kon respekto, La profesora”.
Paso tiempos, pasaron anyos, la madre se envyejesyo i un diya se muryo. El ijo, se fue a la kaza de su madre para vazyarla. Vazyo el bufe, el salon, la kuzina, i vino la sira de vazyar la kamareta de echar. Despues ke vazyo la kama i la garderob, se fue al komodino ke se topava al lado de su kama. Al dip del kashoniko topo un papeliko amariyentado, dublado. Kon kuryozita lo tomo i lo avriyo. Esto era la notizika ke le aviya mandado la profesora a su madre. Ma kon grande enkanto i lagrimas en los ojos lo ampeso a meldar. Estava eskrito: “Estimada Sinyora, Te rogo de no mandar mas a tu ijo a la eskola por ke es un bovo i no puede ni ambezar ni meldar ni eskrivir. Tomalo i mandalo a una eskola spesyala para stupidos. Por modo de el estamos kedando atras la klasa entera”.
Se kedo enkantado. Este ombre ke estava vazyando la kaza de su madre, era Thomas Alva Edison, el djenio ke topo el ampul.
