El 18 del mez de Junyo fue un diya importante ke se yama “El Diya de Los Padres”. Una selebrasyon ke no egzistiya en la antikuedad. Un diya komersyal porke es el diya ke permite de akodrar ke el padre es la kolona ande se arima toda la famiya.
En el anyo 1908, uvo une eksplozyon en una mina de peham (kimur) en la provinsya Virginia de les Estados Unidos i 362 ombres muryeron en esta eksplozyon. En el kazal de la mina izyeron una komemorasyon por los padres ke muryeron en esta ekplozyon. Fue este evenemento ke izo akodrar a una ijika de 16 anyos a fiksar un diya al anyo ke se yamara el “Diya de los Padres”. Esta ijika se yamava Sonora Smart Dodd, ija de un ovrero ke arekojia peham (kimur) ke kayiya en los kaminos kuando el peham se yevava después de salir de la mina a otros lugares. Este ovrero se yamava William Jackson Smart, padre de 14 kriyaturas, kazandose dos vezes i dos vezes kedandose bivdo. Se kargo de kuidar sus proprios ijos i los ke vinieron kon la segunda mujer. William fue apresyado por la djente al rededor, no solo komo padre, ma i komo una madre afeksyonada por los ijos.
Ansi esta ijika, Sonora Smart Dodd, kijo onorar su padre ke mostro tanta devosyon por eya i sus ermanos, en el anyo 1910 perkuro ke un diya al anyo seya konosido komo “Diya de los Padres”. Lavoro komo 60 anyos a ke este dezeo fuera akseptado por las otoridades. Sonora era en mismo tyempo, una artista kompleta, poeta, i eskrivana de livros para kriyaturas. Fue en el anyo 1972, kuando Sonora 6 anyos antes de murir a los 96 anyos, ke el Prezidente Nixon, firmo el dekreto de selebrar “Diya de los Padres” el treser alhad del mez de Junyo. En Turkiya tenemos la mizma data para esta selebrasyon. En syertos payizes de Evropa i de la Amerika Latina, este diya kaye en el mez de Marso, en la fiesta katolika de San-Jozef.
Un koza ke es muy kritikada, es ke de munchas partes komersyalizaron este diya ke se konose komo diya para merkar i vender regalos. Kritikas ke se azen tanbyen por el “Diya de las Madres”. Ama seya lo ke seya, para mi, mis ijos son los padres de mis inyetos i en mismo tyempo mis padres porke a muestra edad ya volvimos a ser kriyaturas i nesesitamos ke muestros ijos seyan muestros padres.
