Frano Selak, un kroata (de Kroatia) era un dezmazalado ke salvo munchas vezes de la muerte. Todos los aksidentes lo topavan a el. Vos kontare komo.
En primero konoseremos ken es Frano Selak. El nasyo en 1929 en la Kroatia. Era un profesor de muzika ke biviya muy simplemente. Ke aksyones pueden akonteser a un profesor? Frano era una makina de aventura. Djusto 7 vezes salvo de las muertes. I finalmente bivio un evenimyento muy enteresante. La aventura de “no murir” ampeso en 1962. Una noche muy yelada ke estava viyajando kon treno de Saraybosna a Dubrovnik, Selak no teniya dingun avizo de lo ke le iva vinir a la kavesa. El treno en supito salyo de su kamino i se arezvalo al lago entezado. En este aksidente se aviyan murido 17 personas. Muestro eroe salvo solo kon un braso roto i reusho a salir en nadando asta al bodre.
Sin ke pase un anyo despues del aksidente del treno, Frank bivio otruna peripesiya. Esta vez estava viyajando kon avion de Zagreb a Rijeka, por modo ke su madre estava dezrepozada. La puerta del avion se avriyo por yerro i Selak se topo afuera del avion. En kayendo del avion, se topo ensima de una balya de pajas. El ya tuvo mazal ama no puedemos dizir la mizma koza por el avion. Frano Selak sovrebivio mirakulozamente entre los 19 pasajeros ke se topavan en el avion ke muryeron.
Despues ke djuro de no suvirse mas al treno o al avion, esta vez el mazal lo topo en el otobus. El otobus ke se suvio Frano se kayo del kyupri abasho, 4 personas muryeron ama el salvo naturalmente. Tuvo solo unas kuantas firridas.
Frano espantandose de estos vehikulos, fue se merko un otomobil. Disho de si para si ke el iva konduizar kon meoyo este otomobil i no le iva afitar nada. Esto disho, ma i los otomobiles le metyeron la kavesa en bela. Todas las dos arabas ke se merko, una en 1970 i la otra en 1973 se kemaron. I de estos fuegos se salvo kon dos tres kemaduras livyanas, i sovre todo se le kemaron todos los kaveyos. Se merko esta vez un otomobil muy muevo. En indose en su kamino, un kamyon le chafteyo i lo echo de la falesya abasho. Al punto dalkavo salto de su otomobil i ansina se salvo kon dos tres yagas. Ma no se eskapo kon esto, en lo ke se salvo de esto i estava bushkando ayuda, un otobus lo pizo i tuvo unas kuantas roturas livyanas. En 1996, en pasando por un viraj se chafteyo kon un vehikulo de los Estados Unidos i lo kito del kamino. Kuando el otomobil estava kayendo, Frano ke no teniya sentura de seguridad, salto del otomobil i kayo ensima de un arvole ke lo salvo de la muerte.
Despues de todos estos pasajes, dos diyas despues ke kumplo su 73. anyo, Selak gano en la loteriya de 900.000 Euros. Akel tiempo se kazo de muevo por la sinkena vez. Se merko dos kazas i un barko. Ma desido de ayudar kon estas paras a los menesterozos. En primero a sus paryentes i a su famiya i despues a las ovras de bienfezensyas.
Frano Solak muryo kuando teniya 87 anyos.
