Los vejetaryanos tienen una diyeta espesyal de nutrisyon. Kaji la mayoriya de los vejetaryanos komen solo verduras, frutas i siertos produktos adekuados a sus diyetas. La vida de los vejetaryanos es pratikada por bastante djente. Produsir vejetables se konsidera komo mas barato komparado a la karne. Ama abasteser i mantener muncha djente es muy difísil. Las populasyones kresen muy presto i kontrolar el nasimyento sovre todo en payizes proves, es un problem muy grande i importante. Mismo konsiderando estas situasyones, en el mundo entero los vejetaryenes no son muy numerozos.
La diyeta entre los vejetaryenes es bastante diferente.
1) Diyeta kombinada de verduras i produktos de leche
2) Diyeta vejetal a la kuala se puede adjustar guevo.
3) Lakta-Vejetaryen es la diyeta kombinada de las mas populares. Se kome guevo-leche del animal bivo antes de ser abatido. Entre raros vejetaryanos se ve una diyeta ke konsiste de karne de poyo o otros ke komen solo peshkado.
4) Una grande parte de vejetaryanos komen de todo manko la karne.
5) Azer una diyeta vejetaryana nesesita muncha disiplina. Es también una diyeta muy saludoza. Komo no kontiene grasas aze abashar el kolesterol por sus lifas i ayuda al sistem dijestivo para ke fonksyone korektamente. Es también un remedyo para abashar la probabilidad de atakes de korason. Es una ruta kurta para pedrer kilos sin azer diyetas alokeyadas. Se dize ke los vejetaryanos tienen una proteksyon natural kontra el kanser. Komo en todas las diyetas en la nutrisyon vejetaryana no se deve de egzajerar. Todo kon karar.
6) Ke es la diferensya entre la diyeta vegan i vejetaryana. Los vejetaryanos no komen produktos de karne. Los veganes no komen ni kualker produkto animal: guevos, miel, yogurt, kezo, leche. Los vejetaryanos se interesan asta la produksyon de munchos produktos alimentaryos i azen el kontrol mizmo de produktos de makiyaj ke no tengan dingun resto de elemento animal. Los veganes tienen un soporto espesyal de vitaminas komo B12, D, Zink, Fyerro, Kalsyum, i mas.
7) Unos egzemplos de menus vegan:
Kombinasyon de soya, bananas, muez, salatas kon sumo de limon, vejetales, bulgur, humus i mas…
Frutas, mansanas, portokales, avokado,
Yogurt i no olvidar de bever bastante agua.
La nutrisyon es un kampo muy ancho. Ay ke tener buenas enformasyones de sentros medikales seryos para adaptar un program ke se pueda utilizar kon konfiyensa. Kada uno deve de tomar el avizo de un doktor ke konose la konstitusyon de su pasyente i sus problemes medikales. Una diyeta kon rezultados buenos puede tener provecho al maksimom en el periodo de la diyeta vejetaryana. Al doktor i al pasyente kaye de ser muy atentos a lo ke azen.
Salud i refua ke vos se aga.
