En el Olokosto, kuando ampesaron a arekojer a los judyos, munchos padres i madres, aviyan dado sus kreaturas a vizinos o a orfelinatos kristyanos, kon la esperansa ke si van a reushir a sovrebivir, los ivan a tomar atras. Tambyen los orfelinatos kristyanos aviyan arekojido las kreaturas ke no teniyan padres ni madres, ni paryentes serkanos.
Anyos duspues, los pokos padres i madres ke se aviyan salvado del Olokosto, empesaron a bushkar a sus ijos. Los papazes les disheron ke no ay ijikos judyos en los orfelinatos. Los papazes les aviyan ansenyado a los ijikos los kostumbres de otras relijyones.
Los padres i madres aviyan reunido la fuerza para sovrebivir el lavoro esklavo de los kampos de eksterminasyon, o se aviyan eskondido durante anyos, solo para pueder adjuntarsen a sus ijos. Agora los papazes estavan ensistyendo ke no teniyan kreaturas judiyas en sus enstitusyones. Estas kreaturas ke fueron arankadas de sus famiyas, fueron arankadas de sus almas tambyen.
Los rabinos vinyeron a avlar kon los papazes. Los papazes les respondyeron ke no puediyan saver kualos ijikos eran judyos porke no aviya dokumentos para provarlo. Por esta razon, no se puede saver kualas kreaturas son de famiyas judiyas. Kuando los rabinos les meldaron los nombres de las kreaturas judiyas, los papazes respondyeron ke estos nombres egzisten en los kristyanos tambyen.
Uno de los rabinos tuvo una idea briyante. "Keremos vinir esta noche de muevo, kuando vash a meter las kreaturas a sus kamas" disho el rabino. El papaz aksepto sin kerer.
Akeya noche los rabinos se fueron al dormitoryo, ande kamas chikas estavan metidas en sira. Las kreaturas, munchas de las kualas estavan en el orfelinato desde ke empeso la gerra en 1939, se ivan a dormir. Los rabinos kaminaron allado de las kamas, gritando: “Shema Yisrael – Oye, Israel, el Eterno es muestro Dio, el Eterno es Uno!”.
Uno i uno, las kreaturas empesaron a yorar i gritar: “Mami”. "Mama" “Mamushka”, kada una en su lingua nativa. El papaz aviya reushido a ansenyar a estas presyozas almas judiyas sovre la Trinidad, el Muevo Testamento i el salvador kristyano. Kada kreatura saviya dizir las orasyones de los kristyanos. Ma, el papaz no aviya reushido a efasar los rekuerdos de estas kreaturas de sus madres judiyas agora asasinadas, metyendolas a sus kamas todas las noches kon la Shema en sus mushos.
