Ansi avlo el Kriyador a Moshe: Pinehas ijo de Elazar, ijo de Aaron Akoen, izo tornar mi sanya, de los ijos de Israel selando mi zelo entre eyos i no konsumi a los ijos de Israel en mi zelo. Portanto de mi firmamyento de paz tendra el, i su semen despues de el firmamyento de keuna para syempre.
Ansi enpesa la perasha de Pinehas; el puevlo djudyo serkandose a el Yarden pozaron en un lugar nombrado Shitim. Los Moavim vyendo ke los ijos de Israel no pensaron de gerrear kon eyos, se aserkaron a los djudyos, sovre el konsejo de Bilam ke les dyo a saver, ke lo ke se puede venser este puevlo djudyo, es kuando reveyan i pasan el komando de el Kriyador. Izyeron todo sus posivle por azer trazyerrar a los djudyos i kovdisyar en las ijas i mujeres de los Moavim. Malorozamente el puevlo djudyo se desho venser de su negra apetite. I se trezyerraron en este partikular, i no mankaron a sirvir i adorar tambien a sus idolos. El Kriyador mando una mortaldad entre el puevlo i muryeron vente i kuatro mil personas. En el tyempo ke estava el puevlo atristado, tuvo la ozadiya, un syerto Zimri del trivo de Shimon, i tomo una ija de un grande personaje de Midyan i se la yevo kon un deskaramyento, delantre de Moshe i todo Israel, en la ora ke todos estavan yorando. Ninguno no tuvo el koraje de azer nada a este akto. Un syerto personaje nombrado Pinhas, ijo de Elazar, ijo de Aaron Akohen, zelo sovre esta desgrasya i mato kon una lansa a Zimri i a Kozbi bat Tsur. Grasyas a Pinhas ke al punto kedo la mortaldad. I el Kriyador le dyo su renkonpensa a Pinhas. I lo desho bivir munchos anyos. I le dyo la keuna gedola a su semen.
