Ya savesh ke kada anyo los dos bayrames muzulmanos el Şalom no es publikado. Es imposible de pueder publikar i distribuir el semanaryo en akeyas semanas. Reelmente no se si el Şalom es bastante kapache de pueder distribuir el semanaryo. La semana pasada teniya 5 o 6 paketos de livros para embiyar a diferentes payizes de la Polonya asta la Finlandia; de los Estados Unidos asta Israel. I malorozamente pagi serka de 4.600 liras turkas (serka de 20 dolares) para pueder embiyar kon la Posta Turka estos paketos. Serka de 18 dolares. Dospues embiyi un mesaj a Karen dizyendo ke devemos de kedar estos embiyos asta ke vamos a determinar los presyos menesterozos. Malorozamente todo modo de transport en todo el mundo esta reelmente muy karo.
Durante el Bayram ya savemos ke la mas grande partida de las personas ke biven en Estanbol abandonan esta sivdad para ir a un otro kazal o a un otro payiz. Diya de Shabat antes del bayram asta Bursa todas las arabas fonksyonaron komo estavan en la sivdad. I de Estanbol asta Bodrum se fueron en 12 o 13 oras al lugar de 5 o 6 oras. Milyones de Estanbollis, Bursalis o Ankaralis abandonaran la sivdad ande biven para pasar una semana al borde de la mar.
Es djusto ke una grande partida salyeron de estas sivdades para irsen a las izlas Gregas. Yo i mi mujer kon syertos amigos mos fuimos a Rhodes. I el Pegasus dyo karar de bolar a esta isla. I empleyimos este avion. Ay munchas kozas ke devo de kontar sovre este viyaje. I este va ser el sujeto de mi artikolo en el Amaneser. Ma vos kero kontar ke a lo manko 30 ombres i tanto de mujeres fuimos prontos para el Kabalat Shabat en la Sinagoga de Rhodes. I reelmente fuimos muy kontentes de estar endjuntos para resivir el Shabat endjuntos.
Vos kero dizir ke el Hazan mos envito para la orasion de Shabat. I malorozamente dingunos no kijeron vinir i el diya de Shabat. Pekado.
Ay miles de sivdadinos turkos, si tyenen la posibiliad de ir a un payiz Evropeo (si tyenen otro pasaporto o el visa Schengen) preferaron de ir a un otro payis. Si no tyenen estras posibilidades se fueron a un payiz de los balkanes ande no tyenen de menester de un visa. Reelmente es un problem ke muestro payiz, la Turkiya esta dando la Nasyonalidad Turka a los ke estan merkando un apartamento de 250.000 dolares. Oy puedeser de 150.000 dolares. Esto es un problem muy emportante para los sivdadinos Turkos i para los payizes Evropeos. I por esta razon los payizes Evropeos no keren mas ke los Turkos (si son Turkos o no) vijiten sus payizes.
Es en el Amaneser ko vos va kontar syertas kozas sovre Rodes.
