Los djugadores de futbol en Italia, mas no van a pueder empleyar el numero 88 en sus kamizas. El governo i la federasyon de futbol de Italia (FIGC) prohibieron el numero 88, porke 88 es un sinyo de antisemitizmo. Los ministros del interior i del deporte del pais, i el koordinador de lucha kontra el antisemitizmo, afirmaron un akuerdo kon el shef de la FIGC, Gabriele Gravina, para kombatir el antisemitizmo en los estadios italianos. Kantikas i komportos antisemitikos tambien van a ser enterdidos i en kavzo de repetision de komportos antisemitikos, el mach va ser anulado. Segun la Alianza Enternasional para el Rekuerdo del Olokosto, antisemitizmo en los maches no puede ser pardonado.
El numero 88 es una referensia al slogan de la Alemanya Nazi, "Heil Hitler", porke la letra "h" es la ochena letra del alfabe. El ministro del Interior, Matteo Piantedosi, disho ke esta desizion va ser “una repuesta sufizante i efikas a los predjudizmos intoleravles ke estan aparesiendo frekuentamente en los estadios de Italia".
El prezidente de la federasion de futbol, Gabriele Gravina, disho tambien ke: “La konfiensa al futbol va ser danyada en la sosiedad italiana, por modo de estos komportos diskriminatorios".
Un segidor de Lazio se fotografeyo kon la kamiza kon el nombre "Hitlerson" i el numero 88 en la espalda durante el mach de Lazio kon Roma en marzo. Era un segidor aleman i era uno de las tres personas ke estan prohibidas de asistir a los maches. Este mach fue anulado por modo de las kantikas antisemitas. Kinze dias antes, un grupo de alrededor 100 fanatikos de Lazio, fueron filmados yamandosen orguyozamente rasistos en un slogan ke esta insultando los segidores de Roma, diziendo ke sus famiyas fueron deportadas a los kampos de konsantrasion. Los fanatikos de Lazio estuvieron yevando en sus manos pankartas kon la eskriturya ‘Auschwitz es vuetra patria’. En un otro mach yevaron pankartas kon la eskriturya ‘Los ornos son vuestra kaza’. La sezon pasada, el entrenador de la maskota de la agila de Lazio, estuvo alavando los diktatores Benito Mussolini i Francisco Franco en dando el saludo de los nazis.
