Komo de koza difísil ke es si no tienes el anjelo de la inspirasyon ke entra por la ventana para ayudarte al momento ke te metes a eskrivir. La oja vaziya se te mete a mirar kon ojos vaziyos i kon una riza sarkastika meneyando el dedo i la kavesa. Eya te mira i tu la miras i a la fin aboltas los ojos al tavan. La oja pensa, “ke bien oy no me va punchar kon el klavye kon todo su fuerza eskrivyendo todo modo de ideas ke le viene a la kavesa i komo dizirle ke a mi no me están plazyendo del todo las maraviyas ke esta kompozando”. Además oy ay una umedad irrezistible i la kalor no se esta suportando. Ayde avre el ayre kondisyonado ama ni esto es un ayre ke me plaze i no esto kontente del todo. Se me toman los ombros i me da dolor de kavesa. Ke se puede azer, ya lo avri el ayre no salyo, kere dizir ke no esta funksyonando. Oy todo esta a la rovez, puede ser ke kon el pye derecho no me alevanti. No, no, ya me akodri. El maestro ke deviya de adovarlo me disho ke devia de topar 2 vidas espesyales i ke en medya ora ya iva tornar. Dainda lo esto esperando. Kreyo ke kon esta kalor es yo ke va perder mis vidas. Para ver si puedo azer algo para ke funksyone, kon los batires ke teniya, tomi un palo i arondji el kapak un poko por aki, un poko por ayi i ke veygo, el ayre fresko esta asoplando. Ke alegriya, ya esta lavorando. Malahimes kon mi, la kaza entera ya esta kaji el polo norte. No ay nada, un chayiziko i un shaleziko a los ombros i me meti delantre la komputadora. Devo de topar un sujeto para eskrivir. La soneriya de la puerta esta sonando. A esta ora agora ken es?! Devo de alevantarme, la kaza vaziya, sola i seka, no ay dingunos ke me ayude i todos los echos kedaron para mi. En la puerta el kapudji kon un papel en la mano, ke no me diga, "Afedersin ama Madam Hanım bu fatura çok mühim". Ya kito las pipitas de la boka. "Bir fark çiktu". Estas 2000 liras se deven de pagar i si no van a kortar la luz el diya de lunes. Sin elektrisidad en este dor es murir. Males i dolores, la karta de kredito esta vaziya. De ande va topar esta para?! "Peki Mustafa efendi", le dishe, entri i serri la puerta. Me esto travando las karnes. Yo ke va azer?! Atyo me vino al tino ke aviya metido debasho el kolchon 3000 liras, akavidoza ke so, para ke se tope un poko de paras, porke todo esta pujando i no se esta abastesiendo.
Sano ke este, mi inyeteziko va tener Bar Mitsva en unos kuantos mezes, i darle unas kuantas liras de oro seriá bueno. El ya me aviya demando una ora ama el oros no piedre de su valor. Koryi a la kama presto presto alevanti el kolchon, travi las 3000 liras, las konti doz vezes i yami a Mustafa efendi.
El, arondjando las pantuflas i el reflo tomado, es ke tiene astma, viene i me dize, "Madam ne oldu da acele acele çağırdın?" "Ayde al bu 3000 lirayı hemen Taksim‘e, elektrik idaresine git, parayı çabuk öde, borç kalmasın." Çabuk, presto Mustafa efendi. El korason en la boka, kon albon me meti un kafe turko sade bien amargo i las pachas alargadas al kanape, tomi un reflo komyendo mis biskochikos de raki. Kafe de alegriya i de sanedad ke seya. Al vermos en serka.
