Se konta a la fin de los tiempos un pranso grande se aparejo en el Gan Eden arekojiendo a todos los padres de Israel. En la punta de la meza el Rey de los Reyes del sielo i de la tierra miro a sus djustos “ke amor, ke alegriya, ke ermozos ke estan kon sus koronas de santedad en la kavesa i sus karas iluminadas de buendad”. Komo ya vino la ora de meldar el Birkat Amazon, el Sinyor del Mundo se adresa a Avraam, el mas aedado “Tu, Avraam el primer ebreo ke espandites mi kreensa i estavas mizmo pronto a sakrifikar a tu ijo regalado, a ti te reviene la onor de meldar esta beraha”. Avraam se alevanta i kon tristeza responde “Yo Sinyor avli mintiras en azyendo pasar mi mujer Sara por mi ermana para ke no me la arevaten por su ermozura, no so dinyo de esta onor”. “Alora, tu Yitzhak el resmido!” “Yo sinyor enjendri dos ijos, Yaakov i Esav. I Esav trusho a Amalek, enemigo eterno de Israel”. “Alora tu Yaakov, ke dates tu nombre a Israel a tu puevlo”. Yaakov respondyo, “Te olvidates Sinyor ke me kazi kon dos ermanas, koza ke no fue permetido por la Ley”. “Alora tu Yosef Atsadik, tu ke salvates el Oriente Medio de la ambiertura”. “Si mi padre Yaakov no meldo la beraha, yo no so dinyo de esto”. “Bueno a ti Moshe profeta de los profetas a ken avli kaje kara kon kara en el Sinay”. Moshe se alevanta, ya tiene 120 anyos ma esta siempre derecho i dinyo. “Ya te olvidates Sinyor ke no me dates el zehut de entrar en la tierra Santa?” Despues de Moshe Rabenu viene el torno de Yeoshua, su disiplo “Yeoshua, tu ke yevates al puevlo de Israel al Kenaan i konkistates Yericho”. Ma Yeoshua respondyo kon tristeza “Grande Senyor Yo no fui bendicho kon ijos i no deshi dingun desendiente” En este punto una boz fuerte i manseva se aze oyer. “Sinyor del Mundo, yo va meldar las bendisyones”. Eyos se alegran, dingunos se aviyan olvidado de David, komo se puede olvidar de David, el kerido del Dio. Ma komo el era el mas mansevo se dyo onor en primero a los padres de la nasyon. En este punto, los andjelos del Gan Eden, kedaron de bolar, todos oyen la bos briyante de fervor, la muzika de David i su ermozura i el kante.
Su boz ermoza, se oye asta el fondo del Gan Eden, el kanta su kreensya al Dio, su teshuva, la ermozura del universo i sus Psalmos ke arebiven tan konfiensa i esperansa a todos los umanos de la kreasyon. No ay mas mijor de el ke supo alavar al Dio Santo. En supito se oyo un suspiro viniendo de leshos. “Ke es esto?” se demandan toda la asembleya de los padres de Israel i los andjelos responden “Es los pekadores del Ginnam ke oyeron a David i se arepintieron de sus pekados”. Se avriyeron las puertas del Ginnam, las puertas del Sheol… Ay 30 siglos ke en todas las linguas se meldan los psalmos de David, el mas kumplido Baal Teshuva de la umanitad.
David Ameleh ke komemoramos kon el kante “David, meleh Israel hay hay ve kayam”. David, “el rey de Israel ke biva i egzista, el Dodi, el kerido del Dio”.
