Dospues del Bayram, la primera semana mos fuimos al echo i por la primera vez diya de shabat i alhad pasimos un fin de semana en la Ada. Ma kon un ojo malo. Aviya un ayre terivle en todas las partes de la Ada. I por esta razon a las dodje de la demanyana solo dyes personas se toparon en la plaj del Klub Anadolu. Es solo a las 3 o 4 dospues de midi ke la plaj estava yena de djente.
Mizmo kon estas kondisyones, noche de Shabat mos fuimos a Aya Yorgi, ke se topa en las alturas de una parte de la Izla. Komo no avia un tyempo maraviyozo muy poka djente se topavan aya.
El mizmo diya en la entrada del Klub aviya una ekspozision de tablos akuarel de la artista Fatma Tan. Este anyo no merki nada de esta artista, porke los tres o kuatro anyos dalkavo le merki mas de dyes de sus lavoros. I en la kaza de la Ada tengo un alay de sus lavoros. Mizmo tengo syertos para azer regalo a un/una amigo/a ke tyene una kaza mueva en la Ada. Ke no vos pareska ke aze akuareles solo sovre la Ada. Tyene munchas akuareles ke reprezentan el ponte de Galata, la Torre de Galata, el palasio de Topkapı i munchas partes del Kuerno de Oro.
En el Klub Anadolu tenemos una sala ande kada semana se realiza una ekspozision de arte. Kada semana una otra ekspozision. I reelmente no ay dingunos ke dan karar para estas ekspozisiones. Mizmo si no son muy famozos de muevo estan ekspozadas.
La semana ke viene una noche de fin de semana, muestro vizino Alper Levi ke es un disk-jokey bastante famozo va tomar shena en el Klub Anadolu para ke los mansevos i los miembros del Klub puedan baylar. Reelmente todas las personas estan bushkando posibilidades para englenearsen.
Este fin de semana teniyamos luvya en la Ada i en Estanbol. Ma las luvyas ke toparon lugar en syertas sivdades de la Mar Preta fueron el empesijo de una desgrasia. Munchos kazales fueron inondados por estas luvyas. Ya savemos ke el tyempo troko estos anyos dalkavo. I tenemos mas munchos ayres, luvyas i desgrasyas. No es muy fasil de kontrolar todos estos evenimyentos.
Este enverano por la segunda vez mos vamos a ir otra vez a la mar kon muestra ija, yerno i inyeta ke van a vinir de la Ingletiera. Reelmente devemos de profitar de estos diyas para ser mas deskansados i tener muncha mas enerjia para el invierno ke vyene.
