Mizmo ke Israel es un paiz chiko, uno de los sekretos de ser fuerte, es la demokrasiya pluralista. Ay una sistema en el paiz ke da la liberta, el derecho a la vida i la partisipasyon a los djudyos de todas las opinyones, desde los mas laikos asta los mas relijyozos. Los relijyozos tyenen una liberta fuerte, por esta kavza eyos abrasan i keren byen el estado. Porke tyenen la kipa enriva de sus kavesas, no son ekspulsados del publiko, no son rejetados de las universitas. Komo no ay una opresyon, los relijyozos konosen i abrasan a Israel komo sus propyo estado.
En Israel, ande keresh ke estesh, no muy leshos, ay las frontyeras de Siria, de Lebanon, de Jordaniya, i de Ejipto.
Es un pais enturado de paizes arabos.
Una karakteristika notable, es la influensya vizible de la relijyon en la vida kotidyana, en la sfera publika.
Aunke Israel no es un estado relijyozo ke baza todas sus leyes en la relijyon, es un estado ke da importansa i la valor menesteroza a la relijyon.
Israel no tyene konstitusyon. Deke?
No egziste un teksto konstitusyonal ke los diferentes grupos del paiz pueden akordarsen. Todas las kolores estan disponibles en la demokrasiya pluralista de Israel.
Los djudyos sekular keren una konstitusyon.
Los djudyos relijyozos keren una konstitusyon konservatrisa.
Los djudyos ultra-ortodoxes deklararon ke, no van a rekonoser dinguna otra ley ke no va ser la ley djudiya.
El estado pluralisto de Israel, tolera todos estos diferentes segmentos.
Las frontyeras del pluralismo en el paiz son tanto anchas ke el estado de Israel rekonose i konta mizmo a los grupos los mas ultra ortodoxos ke se nyegan a rekonoserlo.
Asegura la armoniya de las valores tradisyonales kon la demokrasiya. La siensya i la teknolojiya son una de las endustrias las mas adelantadas en Israel.
Israel es uno de los paizes ke aparta la partida la mas grande a la envestigasyon. Es klasifikado komo el kuatren paiz en el mundo en los estudyos siantifikos.
Los siantifikos Israelyanos kontribuyeron en los kampos de la indjeneriya komo la agrikultura, la informatika, la elektronika, la jenetika, la medisina, la optika, la enerjiya solar i muncho mas i tambyen es la mas komprometida kon la teknolojiya.
Technion, la baza del Instituto de Teknolojiya se fondyo en el anyo 1912 en Haifa.
La Amerika eksporta a Israel, los komputadores, las pyesas de avyones, ekipos de defensya, trigo i otros.
Israel esta eksportando a la Amerika, pedasos de diamantes, djoyas, impresoras, ekipos de telekomunikasyones.
Los dos paizes se akordaron sovre el komersyo afirmado para terminar los derechos de la duana.
Rejyonalamente, la Union Europea es el lider entre las eksportasyones de Israel. Del anyo 2021 en delantre, Israel
tyene el 30en ekonomiya mas grande del mundo.
Entre 187 paizes del mundo, Israel esta el 17en, en el kampo de ser adelantre.
La endustriya de diamantes de Israel es, uno de los sentros konosidos en el mundo entero.
En el anyo 2007, Israel manteniya relasyones diplomatikas kon 161 paizes i teniya 94 misyones diplomatikas en todo el mundo. Estados Unidos, Turkiya, Alemanya, Reino Unido i India se renkontran entre los mas entimos aliados de Israel.
Estados Unidos fue el primer paiz ke rekonosyo al estado de Israel. Despues, la Union Sovietika tambyen aksepto.
La kultura de Israel es inseperable de la istorya del djudaizmo i del puevlo djudyo. La diversita kultural de Israel se deriva de la diversita de su puevlo. Los djudyos de todo el mundo yevaron sus tradisyones kulturales i relijyozos.
Kuatro Israelyanos ganaron el premyo de “Nobel” sovre la kimika. A parte de estos kuatro, en el anyo 1958 uno gano el premyo de Nobel en medisina. En 2004 otro gano el premyo de Nobel de fizika. Munchos ganaron el premyo de Nobel sovre la ekonomiya.
Por terminar, se puede dizir ke Israel es un paiz muy fuerte i muy reushido en munchas areas.
