En los siglos pasados el transporte de syertos bienes se aziya por la ruta yamada de seda i de espesyas. Todo modo de espesyas, ambar, sal, chay, i diferentes animales, bienes nesesaryos por la vida diarya se transportaron anyos i anyos por estos kaminos. La valorizasyon de las espesyas remonta a la antiguedad. La ruta tenia un itineraryo ke pasava prinsipalmente desde el Mediteraneo, la Mar Kolorada, las kostas de los Oseanos Indio i Pasifiko alkansando los puertos de la China. La ruta de la seda es el nombre de las rutas terrestas i marítimas ke fueron aviertas por los Chinezos. Spesyalmente la ruta de la seda fue inisyada en la epoka de Aleksandro el Grande kon la koneksyon entre el Oriente i el Oksidente, konektando China kon Evropa ke fue muy importante en los siglos pasados. Esta ruta se konektava komo un puente entre los dos mundos i su kontribusyon fue i es muy importante también en muestros diyas. La ruta de la seda empesa desde el punto el mas oeste de Evropa asta en punto el mas aleshado del Kontinente Asiatiko. China se konekta por oleoduktos, gasoduktos enormes, i kon trenos a los puertos marítimos importantes de todo el mundo. La gran muraya de China es una antigua fortifikasyon rekonstruida para protejar la frontiera norte de China. La muraya era atakada por los nómadas de Mongolya i Manchurya. Esta muraya tiene mas o menos 2l.000 kms de largor i unos 7 metros de altor. La muraya no es muy ancha, unos 4 a 5 metros de anchura fueron mezurados. La muraya fue dezinyada Patrimonyo Mundial por el Unesco. Es interesante de konoser unos kuantos dichos i frazes sovre kaminos, ke son muy sinyifikantes.
-Mi mundo se avre delantre de los kaminos ke esto rekoriendo.
-Se avrieron dos rutas delante de mi, yo tomi el kamino el muy poko pizado i esto me trusho la diferensya importante en mi vida.
-Largo es el kamino ke te yeva a la luz.
-Los buenos amigos se konosen en los kaminos largos.
-Lo importante para rezolver los problemes es de saver kual kamino ay ke eskojer.
-La linya direkta es siempre la mas kurta, ama no siempre la mas atraktiva.
-Todos los kaminos yegan a Roma.
-Kaminos de leche i miel i no salir del kamino derecho.
A vermos en kaminos alegres.
