Oy kero kontarvos sovre un livro maraviyozo ke meldi unos mezes atras. El livro se yama “Farewell to Salonica” (Adiyo Salonik) i es un livro otobiyografiko eskrito por un ombre ke se yama Leon Sciaky. Leon nasyo en Salonik en el anyo 1894 kuando la sivdad dainda era parte del Imperio Otomano. Komo ya savesh, Salonik teniya una de las mas grandes komunidades djudias en el mundo entero en akel tiempo. En el livro, Leon avla sovre sus memoryas en la sivdad durante su chikez: sovre la maale ande se engrandesyo, sovre las eskolas ande se ambezo, sovre su famiya (ke era una famiya Sefaradi halis), i sovre todas las mudansas ke vido en Salonik durante los primeros anyos del siglo XX. Las memoryas de Leon en Salonik, eskritas en una manera muy profunda i metikuloza, konstituan una de las mijores ventanas a la vida en Salonik durante la epoka de turbulansya en los prinsipyos del siglo XX. El livro kaptura algunos detayes muy valutozos sovre la konvivensya entre komunidades diferentes en la sivdad, sovre la ekonomiya lokala, i sovre las varias ideolojias ke fueron populares en estos anyos. Para mi, las deskripsyones de la vida domestika de Leon son muy presyozas i kale ke todos las melden. Leon avla sovre su granmama i la ermana de su granmama, dos mujeres muy muy viejas. Es muy enteresante porke las deskripsyones de estas dos mujeres es komo si eyas eran una puente entre el periodo moderno ke es reprezentado por Leon i un otro periodo muy muy antiguo i arkaiko. La granmama i su ermana son muy tradisyonales i no les plaze las inovasyones teknolojikas del tiempo. Es kaji komo si eyas vinieron direktamente de la Espanya despues de la inkizisyon. Puede ser ke estas dos mujeres fueron unas de las ultimas reprezentantes de esta djenerasyon ke sovrebivyo asta el siglo XX. Leon bivyo en Salonik asta el anyo 1915, kuando su famiya dyo karar de mudar a los Estados Unidos. Si konosesh la istorya trajika de la komunidad djudia de Salonik, ya savesh ke este karar salvó a la famiya entera. Rekomendo este livro a todos los meldadores ke keren ambezarsen mas sovre la vida djudia i la sosyedad en Salonik durante los ultimos anyos del Imperio Otomano.
