En las vakansas ke uvo la semana pasada, mos fuimos kon una amiga por kuatro dias a la izla “Samos” ke se topa en la “Mar Egea”.
“Samos” es una de las “12 Kolonias Ionikas” establesidas en la istorya. Aki 45.000 personas biven enverano komo invyerno. Es la mas grande izla entre las 12 otras de Gresya, la mas ermoza, turistika i la mas serka de la Turkiya. Mos fuimos en primero a Kuşadası i de aya kon un feribot ke sureyo una ora i medya a “Samos”.
Una izla agradavle, silensyoza, kon grandes plajes, la natura formidable ke es sorprendiente. En esta izla, se topa la “Universita Samos” ke tyene 2.500 elevos, i una eglisya muy grande. Las guertas de azitunas i las sharas de pinos, una izla ke se topa solamente a 3 kilometros mas leshos del bodre de la mar de la Anatolia.
Inkreivle, ma djusto enfrente de Kuşadası, la izla de Samos es konosida entre mozotros komo “La Izla de Sisam”.
El importante filozofo, matematiko i muziko de la antikita “Pitagoras” era de Samos. En los magazenes de regalos se estan vendyendo los “vazos de Pisagor”.
Kuando estamos metyendo una kantita de likido ke esta pasando la linya del interyor, grasyas a un sistema espesyal, todo el likido esta koryendo afuera del vazo.
“La kupa de la djustisya” de Pitagoras: Aryento de la kupa ay un mekanizmo, una kolona i un kanal ke esta aryento de la kolona. Kuando metemos la agua fina debasho el nivel de esta kolona, se detyene i la agua no korye afuera.
Ma, si la agua esta mas alta del nivel de esta kolona, la kolona den medyo i el kanal se inchen de agua i el efekto de sifon entra en aksyon.
Entonses, la agua ke esta aryento de la kupa se vazya enteramente. Esta “Kupa de la Djustisya” de Pisagor, kon esta karakteristika parese a un objeto misteryozo. El sekreto ke tyene apoya la kreensya filozofika de la eskola pitagorika.
“El Monasteryo Spiliani” se topa en Pytagorion sovre una kolina, de ande se puede ver una vista maraviyoza de la sivdad i del porto. “La Statua de Pisagor” se topa en el porto de la sivdad Pytagorion. Esta statua esta en una forma triangular i rektangulo.
“Manolates” es un kazal en la montanya kreada por los artistos. El nombre del kazal esta vinyendo de dos famiyas nombradas “Manolas” ke ayegaron a esta rejyon en el anyo 1794. Atolyes de seramika kon vista de sharas… La natura, el arte i la serenita. En este kazal biven solo 130 personas. En este kazal reina solamente el silensyo, la pas i el repozo.
Los otobuses no pueden suvir aki, se puede vinir solo kon autos. Un poko montanyozo, un poko kalejas kon eskaleras, se puede eksplorar a pye.
La produksyon de seramika, el turizmo i el kultivo de olivos, son las prinsipales fuentes de mantenimyento.
Para arivar a “Monolates” estamos pasando de una shara vedre yena de arvoles de azitunas i de pinos. Kuando suvimos ariva, estamos vyendo la plaj de “Kokkari” kon una vista ekselente.
La estreya briyante de Samos es “Karlovassi”. Una sivdad ke tyene un grande pasado, kon un briyante futuro. Es famoza kon la plaj “Potami” ke es en forma de korason. Esto es el simbolo de Samos.
El vino, kon la azete de oliva de Samos son famozos.
Una mar kolor turkuaz maraviyoza, sin bruido.
Munchos turistos estan vijitando Samos, de paizes diferentes. De Turkiya, de Alemanya, de Amerika, de Olanda, de Ingletierra ets…
Las vakansas son ermozas i dan a la persona un muevo poder i enerjiya para lavorar kon mas muncha ardor.
Keridos Lektores, vos oguro una enveranada kon sanedad i kon muncha felisidad.
