El grupo Shemesh Karmiel ke fue fondado en el anyo 2004, reprezenta la komunidad judia turka en festivales de bayles, en el etranjero. Este grupo de 380 personas es kompozado de 12 ekipos separados entre las edades de 6-50. Los partisipantes del grupo son de munchas profesiones, ma la majorita son estudiantes universitarios. Tienen komo objektivo baylar endjuntos, i aparejar spektakulos de nivel profesional.
Los bayles ke interpretan son bayles folklorikos israelienos i munchos otros stilos de bayles en shenas muy prestijiozas i tambien partisipan al "Festival Karmiel" en Israel kada anyo. Las shenas i los bayles son dizenyados kon el tema de akel anyo. Enterpretan bayles tradisionales i modernos para amostrar la vivasidad i la variedad del grupo.
Los mezes ke pasimos, realizaron un spektakulo inolvidavle kon un ekipo de mas de 300 personas en el Sentro de Artes en Zorlu. Durante 15 anyos partisiparon a los Festivales de Bayles Karmiel en Israel i este anyo tambien, en el 12 de julio, partisiparon al Festival AsdoDance organizado en Ashdot.
El ekipo esta diziendo ke pueder reprezentar la komunidad judiya turka en el etranjero no tiene presio. AshdoDance es un festival de bayle entegral organizado en Ashdod desde 2016, ande se enterpreta munchos stilos diferentes de bayle. Durante kuatro dias, azen varias aktividades i provas de los bayles. Un spektakulo muy grande se realiza la primera noche del festival.
Este anyo, el program empeso kon Noa Kirel, la kantadera ke gano el treser lugar en el konkurso de Eurovision. Munchas kantaderas israelianas populares komo Benaia Barabi i Narkis, i grupos de bayles populares mondial, partisiparon al festival. El ekipo esta diziendo ke kompartir la mezma shena espesialmente kon Noa Kirel, ver su bayle i ser parte del espektakulo fue una eksperiensia inkreivle.
En el espektakulo, realizaron el bayle 'Kazablanka' kon la koreografía de sus Direktor de Arte, Shlomo Maman. Antes del festival, aviyan echo munchas provas en Estambol. Kuando arivaron a Ashdod, se reunaron kon el Grupo de Bayle de la Universidad de Tel Aviv (TAU) para realizar el bayle endjuntos.
Estan diziendo konoser i azer amigos de diferentes paizes es grande plazer por eyos. Ademas, pueder ir a festivales en el etranjero, es una fuente de motivasion. Lavoran muy duro para aparejarsen a la aktuasion, se kansan muncho, komparten munchas kozas i se divertan muncho. Despues de kada festival, dizen ‘Grasias al Dio ke lo izimos’.
