Yo tengo dos vidas, una de invyerno otra de enverano. Agora vash a dizir kualo es dos vidas? La repuesta es ke enverano bivo muy diferente de en invyerno.
En invyerno bivo kon planos i programes. Por egzempyo, lunes i myerkoles tengo kursos, martes es diya de fikso kon las amigas de anyos. Djueves es diya de ir al bazar, empleyar i diya de el koro, NES. Entremyentes me vo a Moda i a İstinye a ver a los inyetos, a las ovras i fin de semana u teatros u filmos u konseres; lo ke mos dyo el Dyo.
Esto kontinua fin ke se eskapa los kursos i se serran las eskolas, los ijos se van en vakansas i yo kedo solika, de muerte no. Tomo la validja i me vo a la Büyükada.
Aki empesa la vida de enverano. Komo me alevanto muy demprano, no syempre ma de vez en kuando me vo a kaminar en el bodre de mar i dospues me vo a la plaj.
Sali no sali a kamino empeso a saludar, empeso a sudar. Porke kale ke des kuentos.
--- Forti a la plaj te estas indo???
Si dishites si:
--- No te vayas, ay ayre
Una otra,
--- Vate bova, ay murir
Apenas di dos pasos,
--- Ande bueno, a Estanbol vas abashar?
Si dishites si, las demandas no topan kavo,
--- Kon ke vapor?
--- Para kualo vas abashar?
--- Ke echo tyenes en esta kalor?
Si dishites no,
--- Deke no vyenes a bever un kaviko?
--- Deshala eya, no tyene tyempo
(Ya le dyo la repuesta por mi!)
Si entri al charshi:
--- Oy no ay mar???
--- Kualo vas a empleyar???
--- Ke se va gizar oy???
--- Toma sardela, esta muy freska; aze i una choban salata
--- Del primer no tomes, esta muy karero
Un poko mas aya:
--- A la mar???
--- De ande entras???
--- Esta limpya???
--- Inezika ya vino???
--- A Suzan la vites? Le nasyo tresera inyeta
--- Los ijos? Kuantos inyetos tyenes?
Bendicho el Dyo, la primera eleksyon ya la pasi. Apenas entri a la plaj,
si me fui demprano:
--- Tu no vyenes estas oras, ke te afito?
--- Deke vinites presto? Oy no tyenes djugo?
Si dizes si:
--- Kon ken djugas?
Si dizes no:
--- Deke?
--- Atyo mirala, halhal se metyo
--- Bravo a esta edad, te metites halhal?
(Ke es la edad de meter halhal, no se)
En pasando a la mar:
--- Forti se engodro no???
--- Yok djanim, se aflako
--- Ayde deshalas ke digan, esta muy buena mashallah
(Neysa ya dyeron karar)
Si suvi a la guerta a djugar, aya es otro teatro.
(Los nombres son imajinaryos)
Sara no djuga kon Mari
Mari no djuga kon Ester
Ester no djuga kon Lili
Lili no djuga kon Suzan
Suzan no djuga kon Beki
A la tadre:
Iijikas, amanyana a las 2 en la guerta.”
Keridos lektores no kije ni djuzgar, ni akuzar a dingunos; es ke me plaze azer shakayikas.
El Dyo ke no mo la trayga a dezear esta vida. Ke no manken porke esto es sin apareser una terapiya muy grande.
Kon demandas i repuestas buenas para kada anyo ke mos ayege el Dyo kon todos djustos.
