Kada uno de mozotros traversa un dizyerto en su vida. El dizyerto es una parte de muestra egzistensya, es largo o kurto, es un kamino duro i penivle, kamino de soledad i de pena ma ke ayuda a konoserse a si mizmo i a dar un muevo sensyo a su avenir. El dizyerto es un egzamen, un ponte, un pasaje ke kale traversar sin kedar en el. En muestra Tora, el dizyerto es mensyonado munchas vezes komo tema de baza. Adam echado del Gan Eden, entro en el dizyerto de vida dura i gano su pan a la sudor de su frente. Noah traverso un dizyerto de keshina antes de ser proprio a tomar las syete leyes noahit. Avram paso un dizyerto kanseryozo antes de ser Avraam. Moshe rabenu izo pasar a su puevlo 40 anyos en el dizyerto antes ke se aga un puevlo dinyo de entrar a su tierra. Israel paso los dizyertos de sus galutes antes de arivar a su estado de oy.
Mos akodraremos ke un esklavo liberado en la antikidad kaliya ke pasara un tiempo en el dizyerto antes de konoser la libertad. Oy la umanidad entera esta traversando los dizyertos los mas duros de su istorya, es ke va pueder vinir a una epoka mesianika, es ke el ombre ke traversa estos dizyertos va arivar a un estado de mijoriya ke le ambezo el kamino de sus dizyertos? La repuesta la toparemos en mozotros mizmo, en muestra teshuva komplida…
6000 anyos antes de dizyerto mos ambeza muestra Ley 6 dimensyones. Ya estamos para entrar en la 7. Milenero es ke la luz esta para amaneser sin el dizyerto? La umanidad entera esta entrando en otra perioda . Es ke vamos a ayegar a ver komo mo lo aze esperar muestra ley, ke el lovo i el kodrero komeran lado kon lado en una era de fraternidad i de pas.
