En una sivdad aviya una kaza para los viejos. Entre estos viejos aviyan unos ke estavan en perfekta salud i otros kon siertas hazinuras i siguro Alzheimer. El direktor de esta kaza era un ombre muy onesto, laboriozo i piyadozo. Ya aviya 35 anyos ke estava lavorando aya. Ya le aviya vinido el tiempo de retirarse. (Azerse jubilado). Unos kuantos diyas antes ke ya estava para irse a su kaza, estava muy penseriozo. Komo i a ken iva deshar esta kaza. No era kolay, 35 anyos, una vida entera. En pensando pensando, le vino al tino el ayudante suyo. Lo yamo a su lado.
El ayudante vino, el direktor lo izo asentar i le demando. “Yo en 35 anyos, no reushi a topar una buena persona para ke lavore kon mozotros. Ya les demandi diplomas, les demandi sus famiyas i munchas mas kestiyones. Tomi buenas repuestas, buenas enformasyones ma malgrado esto no kedi kontente de estas personas porke se komportavan muy negro kon los vyejos. Esto no puedo akseptar. A la fin me enfasyi i te deshi a ti ke eskojgas las personas kon las kualas vamos a lavorar.
Tu reushites muy muy bien. Todas las personas ke tomimos al echo kon tu intermedio, salieron perfektos. Adjideyozos, kon korasones buenos. Dizeme te rogo komo reushites a topar las personas ke keriyamos.
El ayudante le respondyo. Kon la ayuda de esta ventana. Komo? Le demando el direktor. Vos kontare, le disho el ayudante. De esta ventana se ve la entrada de esta kaza. De la puerta de la guerta asta la kaza ay un kaminiko bien largo. En este kaminiko ay munchos nidos de ormigas. Los kandidatos ke entran por la puerta de la guerta deven de kaminar por este kaminiko para vinir asta ande mozotros. Aviya unos ke kaminavan direktamente sin mirar en basho i ekrazavan estos nidos, aviya otros ke mahsus pizavan i ekrazavan estos nidos i aviya otros ke aziyan atansyon a no pizar a los nidos i no matar las ormigas. Yo pensi ke si una persona no mata i no danya las ormigas, siguro ke va ser piyadozo kon los viyejos. I eskoji estos komo lavorantes.
Esto no me lo pensi del todo, disho el direktor. Agora kon repozo me va irme a kaza, kon mi korason repozado va deshar esta kaza en tus manos.
