Kada anyo en enverano kuando se serrava la eskola al otro dia estavamos en la Büyükada. 3 mezes moravamos aya, kon mi granpapa i granmama endjuntos. I kaji un mez viniya la sovrina de mi madre, kon el ijo i se kedavan ande mozos. La kaza muestra era muy grande, moravamos en frente de Plaj Otel, teniyamos un balkon grande i tomava ayreziko fresko, este modo diziya mi granpapa. Kuando era chiko en enverano, mas muncho me plaziya shabat demanyana porke aviya dezayuno. El dezayuno de enverano no puediya egzistir en dingun lugar, mi granpapa era ombre otomano. Se alevantava presto, toda las vistimyentas de la noche se aprontavan, la kamiza, el pantalon, los kalsados de la noche se boyadeyavan, ni shabat, ni alhad sin gravata no se asentava. Por esto shabat demanyana se vistiya tringa i se iva al kal de la Büyükada, i viniya kaji a las 10.30, la meza de dezayuno en el balkon estava pronta, kada shabat para dezayunar viniyan loz vizinos ke moravan en el otro palye. Eran los de Barokas. Ijikos en una meza, las borekas estan dizyendo, ande kedatesh, una partida de berendjena, una partida de patata kon kezo, las bulemas de espinaka kuando lo estas metyendo a la boka de la freskura la boz estas oyendo kıırrt.
Los guevos haminados amariyos amariyos kon pimyenta, al lado kashkaval i kezo blanko, i viene a la meza una tapada de berendjena la golor ya abasta para derritir, el melon kon el karpuz son el rey i la reyna de la meza.Todos estamos mirando a la boka de mi granpapa ke va dizir behavod. I diziya la beraha para empesar al dezayuno. Teniya una kupika de likör chika, kon esto beviya raki i empesava a kontarmos konsejikas de Tora. I dizyendo ke no manke este ermozo dezayuno de todas las famiyas. Malorozamente este dezayuno ermozo agora solo esta en los rekuerdos.
Enveranada buena, kon sanedad i kon alegriya. En buenos dezayunos al vermos!
