Ayer empeso el filmo Barbie en los sinemas de Estanbol. Kije eskrivir unos kuantos byervos sovre la kreadora Djudia de Barbie, Ruth Handler.
Algunos pueden demandarsen kualo iva ser la reaksyon de Ruth Handler en vyendo las Barbies de varias granduras aparejados serkamente. Avyendo respondido finalmente en 1997 a las kritikas sovre la figura imposivle de la Barbie orijinal en djugando kon las proporsyones i las granduras i proporsyones, Mattel (el fabrikador de las Barbies) agora troko el model kompletamente i kreó una gama de puerpos muevos de Barbie.
Si bien ke el model renovado de Barbie es syertamente una inovasyon buena ma Ruth nunka dyo emportansa a las kritikas de la Barbie orijinal. Avyendo desinado el model despues de ver a su ija reprezentar sus aspirasyones de adolesentes kon kuklas de papel, Handler penso ke la chika estava dando a kada kukla un rolo de su futuro adulto. I, si bien Barbie fue akuzada de azer danyo al feminizmo, la mujer ke la kreó fue una mujer de negosyos de grande reushita.
Handler, la dyezena i la mas chika ija de Djudios polakos ke se establesyeron en Denver, Kolorado, se kazo kon su amor de la chikes (Izzy Elliot Handler) i, poko despues, se fue a Los Angeles. Aya ayudó a su marido a krear un echo ke fabrikava novedades de plastik. Se asosyaron kon Harold "Matt" Matson i los Handlers formaron Mattel, i la kompaniya topo su primera reushita, el ukelele (una forma de gitara) de djugete "Uke-a-doodle", en 1947.
Handler kontinuyo a lavorar en el negosyo de su marido i de otra parte engrandesyo sus dos kriyaturas, Barbara i Ken. En el empesijo la kompaniya rezistyo a su ideya de una kukla para adultos, ma los konvensyo para aprovar. Las vendidas en el empesijo fureon avagar. Ma esto troko kuando Mattel izo la publisita de Barbie kontinualmente durante el muevo program de television Mickey Mouse Club de Disney. Los Handlers kedaron kon Mattel asta 1975, kuando un skandalo finansyero los ovligo de demisyonar de la kompaniya.
Ruth Handler puede ser mijor konosida por la kreasyon de Barbie, ma tuvo una segunda karyera importante despues de su bataya kontra el kanser de pecho. Handler kriyo Ruthton Corporation, ke fabriko "Nearly Me", un implant mamaryo para mujeres ke aviyan pasado una mastektomiya.
Ruth Handler muryo de kanser de kolon el 27 de Avril de 2002.
