Kreo ke estamos de akordo ke estamos pasando un enverano puro. Es diya de viernes ke tuvimos una kalor terivle, sin ayre kon 40 grados de kalor. Malorozamente no mos plaze muncho un aver asemejante. Kon estas kalores empesimos a ver fuegos en las kampanyas. Komo el tyempo esta muy seko, es muy fasil de tener un fuego. Es diya de shabat ke tuvimos un poko de ayre i estava mas mijor.
Mizmo kon estas kalores en la Ada, munchas Fondasiones i Asosiasiones organizan evenimyentos kulturales. Diya de alhad en el Muzeo avia una konferensia sovre el Orfelinato Grego ke es el mas grande edifisio de tavla ke se topa en la evropa. Fue fraguado para ke sea el Otel el mas shik d’Estanbol. Ma el Sultan no les dyo la permision para ke puedan lavorar. I un Grego muy riko merko este edifisio para azer un Orfelinato Grego.
Es en el mez de agosto ke el Muzeo de las Izlas va organizar una fin de semana ande munchos eskrivanos van a firmar sus livros. Yakup Barokas ke va vinir d’Israel, el sinyor Viktor Albukrek van a tomar lugar entre estos eskrivanos.
La Izla de Prinkipo reelmente kon los evenimyentos kulturales ke se esta organizando, tomo un lugar muy emportante en la vida kultural de muestra sivdad, Estanbol.
Pekado ke no organizamos una aktivitad sovre muestra lingua i kultura en las izlas. Si tenesh siertas ideas las puedemos realizar. Un syerto tyempo se avlo de organizar pransos sovre diferentes temas. Komidas Djudias, Gregas, de la rejion de Antakya o otras sivdades. Reelmente esto puede atirar munchas personas. De diya en diya tenemos mas munchos lugares / restoranes ande se puede komer todo modo de komidas. I estos lugares pueden organizar komidas diferentes.
Vemos ke mizmo en invyerno muncha djente moran en la Ada o vienen a pasar el diya o la fin de semana. Kon esto los magazenes ke serravan en invyerno agora estan avyertos anyo entero.
Devemos azer munchos esforsos para tomar lugar en la kultura de las izlas kon muestra lingua i kultura.
