Tisha B’Av es el dia el mas triste del kalenderio judio. El 9 de Av, 586 B.C., el Templo de Salomon fue tomado por los Babilonios. Los judios fueron embiyados al egzilio. Por esta razon, Tisha B’Av es nombrado komo ‘el dia de lagrimas’.
Anyos duspues, Cyrus permetio los judios a tornar a Yerushalayim, i de rekonstruir el Templo. El profeta Zakarias, les disho ‘Estos dias de tristeza, agora deven de konvertirsen en dias de alegria’.
En el anyo 70 C.E., los Romanos destruyeron el Segundo Templo, ovligando los judios a irsen al egzilo. Una vez otra, Tisha B’Av se konvertio en dia de dolyo.
Otras trajedias afitaron en dia de Tisha B’Av:
135 C.E.: La kaida de Bethar dio fin a la rebelion de Bar Kochba.
136 C.E.: Una sivdad pagana fue konstruida en el sitio de Yerushalayim.
1244: Las Toras i los livros relijiozos fueron kemados en Fransia.
1290: Los judios fueron ekspulsados de Ingletierra.
1492: Los judios fueron ovligados a abandonar Espanya.
Ansi, Tisha B’Av se konvertio en ‘El dia preto, el dia de taanid, el dia de lagrimas’.
Tisha B’Av, komo Yom Kipur, empesa kuando se abasha el sol, i se eskapa el dia sigiente, kuando se abasha el sol.
Anyos antes, los Rabis diziyan ‘Kuando viene Av, toda la alegria se va’. I ansi, del primer dia de Av, no se komiya karne, no se beviya vino, no se vistiyan vistimientas limpias i no se aziya dinguna selebrasion. La komida de la noche de Tisha B’Av deviya ser modesta, komiyan solo guevos duros i fideyos. Los relijiozos se durmiyan en basho, kon una piedra en lugar de kavesal. En dia de Tisha B’Av, no se puediya komer, bever, lavarse, uzar parfumes, vistirsen kalsados de kuero u partisipar a una okazion de plazer. Akel dia, los ombres no se ivan al lavoro i tambien era enterdido de meldar la Torah, porke meldar la Torah es una aktividad alegre. Solo el Livro de Lamentasiones i unos kuantos shapitros de Jeremias se puedian meldar.
Otro kostumbre viejo de Tisha B’Av era las vijitas de simeterios. Segun la leyenda, los ombres grandes del pasado se alevantan de sus tombas en dia de Tisha B’Av, para yorar la piedrita de la gloria de Israel. En los puevlos de Polonya, los ijikos chikitikos deshavan revolveres de tavla enriva las tombas, para ke los muertos se alevanten i gerreyen kon los enemigos de Israel.
En Tisha B’Av, la Sinagoga se transforma, de una kaza alegre a una kaza de dolyo. Las luzes no se asienden, el Ehal se serra kon una ropa preta. El livro de Lamentasiones se melda akel dia.
