En el mundo ay munchas sivdades ke se konosen kon sus torres antiguas komo Paris, Londra, Washington, Newyork i munchas mas. Estambol es una de estas sivdades ke puede ganar el primer premio por ser una kapital antigua i istorika. Entre las torres de Estambol keriya enumerar unas kuantas ke mos simbolizan la sivdad i entre eyas las ke mos desharon rekuerdos inolvidables de muestra chikes. En engrandesyendomos también rekuerdos mas romantikos ke mos akodramos kon muncho plazer pasaron entre estas torres.
Kız Kulesi asta ande nadavan desde la plaj de Salacak, yena de leyendas kon la prensesa guadrada para ke no seya punchada por kulevras, la Torre de Galata, ke dyo su nombre a una maale yena de Djudyos, ande en sus kayes se oyiya lo mas el Ladino komo lingua maternal. Esta torre fue konstruida por los Djenovezes en el siglo 14. I se puede ver desde la entrada de la mar de Marmara, en su lado Evropeo. Beyazıt Kulesi, aryento de la guerta de la Universita de Estambol, una torre ke mos mostrava el tyempo ke iva azer kon las luzes diferentes komo el vedre por la luvya, el kolorado por la inyeve, el amariyo por el bruyar i el mavi por el buen tiempo. La torre de Dolmabahche ke fue adjustada al palasyo komo 30 anyos después (1890-1895) por el Sultan Abdulhamit i por el orlojero, Johann Meyer, ke de kuando teniya 33 anyos ke se izo el kapo de los orlojeros del palasyo. Su botika ke avryo en Karaköy en frente del Tunel bivyo asta el anyo 1981 kon su ijo, Emil i kon su inyeto, Wolfgang. Se dize mismo ke regaló al Sultan una ora muy spesyal mostrando en mizmo tyempo la ora normal kon la ora de orasyones Muzulmanas.
La torre de tiempo de Tophane oy se esta puedyendo ver, grasyas a la ovras de konstruksyon del muevo puerto de Galata. La mueva Çamlıca Kulesi, ke une todos los kanales de Televizyon i sentros de meteorolojiya, tyene una altura de mas de 220 metros i es la mas alta kula de Turkiya. La vista del Bosfor i de la Mar de Marmara es unika desde Çamlıca, ke kere dizir, kolina de los pinos.
Por fin la kula la mas famoza es la la kula de la ora de Büyükada al lado de la eskala de los Faytones ke no egzisten mas. Para munchos de mozotros fue el lugar de randevu, de enkontrarmos kon amigos, asperando al vapor ke iva trayer muestros keridos kuando tornavan a la ada.
