Ya vos konti ke me gusta viyajar. Para mi “VIAJAR ES UNA PASION”. Unas kuantas vezes mos fuimos kon Kruseros a los paizes Adriyatikas, a los paizes Baltikos, i a las izlas del Karibe. Por agora dainda no mos fuimos ama mas de esto ay Kruseros para el Mediteraneo, Oriente Leshano, a los Fiyordes, a Kanada i Alaska, Amerika del Sud, Peninsula Arabika, a las Izlas de Gresia, ets. Viyajar kon Kruseros tyene otra savor.
Imajinávos una sivdad muy moderna de 5.000 personas. Tiene unos kuantos restaurantes, pisinas, SPAs, terrasas de observasion, diskoteka para baylar, diferentes komersios, ets; komo dishe un sivdad mederna de 5.000 personas. El bufe del restaurante es komo el bufe de un otel 5 estreyas. Lo ke vos viene al tino ay en la meza, i es muy riko el bufe. Las kabinas del vapor son diferentes. Ay kabinas kon balkon, ay kabinas solo kon ventanas, sin ventanas, kabinas de trajes. El diya entero tenesh unas kuantas aktividades, komo kursos de baylar, komo bingo, konkursos diferentes. No vos deshan ni un minuto vaziyo. Si no keresh azer nada, puedesh entrar a las pisinas, o al SPA, o si vos puedesh asentar en las kafeterias i bever unas kozas komo kafe o beverajes yeladas.
Kuando yega a un puerto, abashamos i kaminamos la sivdad. A vezes tomamos el tur del vapor kon gia turistika. Avezes kaminamos solo kon los amigos la sivdad ke vijitamos. Mos vamos a los muzeos, kaminamos las kayes, vijitamos los lugares turistikos, i despues tornamos al vapor. Antes de komer por la noche, ay spectakulos muy famozos, komo ke estash en Broadway en el salon de teatro.
Las noches komemos en el restaurante ke es “a la carte”. Kada noche sale menus diferentes. Puedesh komer, en primero entantes, salatas, el plato prinsipal puedesh tomar, komo karne o peshkado o si no gayna. En el final vos trayen dulses diferentes o si no dondurma. Si tenesh diyeta de komer, puedesh dar el orden de mas antes, komo Kasher, o sin Gluten, o vejetaryen si no Hindu o diabetika. Todo modo de menu se puede topar.
Despues de komer ay bares diferentes, komo djaz bar, piyano bar, bar de muzika latina. O si no puedesh asentarvos en las kafeterias. Las noches se avre el Casino i asta la demanyana puedesh djugar kon las makinas o si no rulet, poker o black jack.
Mozotros viyajimos con kompanyias de kruseros ke se yama Royal Carabien i MSC. Ay otras kompanyiyas kon las kualas dainda no viajimos, ke se yaman Holand America, Royal Princes, Silver Sea, Costa, i Celebrity.
Lo bueno i lo mijor vos deshi en alkavo para kontarvos. Me vash a demandar todo esta bueno pasha kuanto vale este viyaje ke estas kontando. Kada destinasyon i kada kabina tyene otro presyo. Por esto no vos puedo eskrivir de aki. No vos pareska ke es muy karo. Para kada aldikera ay presyos. Por esto, vos rekomendo ke agash si no una vez en la vida estas vakansas.
Viajar Es Una Pasion
