Todos ya savemos ke los diyas de Sefer son Lunes i Djueves. Ma ke es la razon de estos diyas i no de otros, i deke se eskojo este tiempo de la semana…
La razon es atada a un shapitro de muestra istorya ke se situa en el 5en siglo AJ. La era kristiana en la epoka del Skrib Ezra al retorno de Siyon despues del galut de Babel ke ampeso en el anyo 586 AJ. En 536, el Rey Sirus de Persa ke konkisto Babel dyo el permiso a los Judios de tornar a Yerushalayim i de fraguar de muevo el Beit Amikdash. Sovre la kondukta del Prens de Yehude i del Kohen AGadol un konvoy de 40.000 egzilados de Babel tomaron el kamino de Siyon. La fragua se eskapo en 20 anyos kon munchas difikultades, se puede dizir ke los Judios fraguaron sus templos kon en una mano el martiyo i en la otra una arma siendo ke los Samaritanos i otros los atakavan noche i diya. El sigundo Templo se eskapo en 516 AJ. i se avriyo a la populasyon judiya para ke ampese de muevo sus orasyones, ma malorozamente las difikultades aflakaron muestro poder kultural, sosyal i ekonomiko, un koryente de asimilasyon i kazamientos kon miembros ajenos. La populasyon lokal metyó en perikolo sosyal muestro puevlo ke abasho de grado spiritual kon todo modo de visto i sovre todo, relijiozo. En estas sirkonstansyas, el Skrib Ezra, a la kavesa de 1800 Kohanim i Leviim se metyo en kamino de Babel kon rikos regalos del rey de Persa i donos de rikas famiyas egzilados. Ma el tablo ke se prezento delantre de este konvoy dirijado por Ezra fue una verdadera trajediya. El judaizmo estava para despareser, mujeres ajenas donde las kriyaturas eran leshos de la kultura i de la relijyon judiya. El ivrit se aviya desparesido enteramente. Es ke era la fin del puevlo Judio? Muestras tradisyones i la Tora kaje inegzistente? Delantre de este tablo de dejenerasyon totala, Ezra se echo en basho arastando sus vistidos, yorando su dezespero… “O Dio Santo, me averguenso de tornar mi facha verso a Ti, muestros pekados son muy grandes, ya alkansaron a los sielos, komo puedo mas adresarme a ti Kriyador del Mundo? I el puevlo entero yorando i aharvandosen djuraron a tornar a sus leyes, a sus judaizmo i de espartirsen de sus mujeres ajenas, i la reforma ampeso. Ezra peno a arebivir muestra Ley, muestras tradisyones, muestra Santa Tora, muestro Shabat i muestras fiestas, avriyo sentros relijiozos i kultural i eskojo los diyas de Lunes i Djueves ke eran de bazar ande la populasyon era numeroza, ande todos viniyan para empleyar.
Profitando de estos diyas de djentorya de la sivdad, Ezra dreso estradas ande se suviya un kompetente de la Tora, kon a su derecha i siedra un traduktor, un komentator ke davan a entender los tekstos siendo en ivrit, lingua de muestros padres ke no eran konosidas por dingunos. Ansi Ezra parvino a azer una reforma i arebivir muestra ley ke ya aviya kaje desparesido. Sigun munchos manaderos diferentes Lunes i Djueves, diyas de Sefer datan de la epoka de Ezra, diyas de charshi ande la populasyon era mas arekojida de la sivdad. Ezra eskojo estos diyas para la lektura de la Tora, Lunes i Djueves, diyas de Sefer para mozotros, i kontinuimos siglos asta oy.
