Ay unas kuantas semanas ke no tenemos repozo kon los fuegos ke vemos en la Turkiya, en la Gresia, en las izlas Gregas i kaji en todos los payizes de la Evropa. Reelmente es un a desgrasia bivir esto todo.
En Rodes, izla grega ke vijiti unas kuantas semanas antes, el fuego kemo una grande partida de los arvoles ke se topavan en el sentro de la izla. Esto muy kontente porke la vyeja sivdad ke es la partida la mas istorika de la izla esta sana i no fue tokada por el fuego. Vimos ke el fuego no se kedo en una semana…
I en Turkiya empesando de Kemer vimos fuegos en munchas sivdades i kazales en el sud i en el oeste del payiz.
En Israel vimos un otro fuego. El fuego de la demokrasia. Ya savemos ke Israel es un payiz ke es dirijido por la ley Djudia; ma de la otra vanda es un payiz demokratiko. I vemos ke en los 75 anyos de su egzistensia fonksyono una demokrasia de la kual todos los payizes se selaron.
Sin konstitusion reusheron a dar koraje a las kompanyias internasyonales para ke realizen muevos echos en Israel i vemos ke munchas kompanyias emportantes realizaron muevas firmas en Israel i no se espantaron de las leyes. Asta ke el Primer Ministro Netanyahu insistiyo kon sus amigos relijiozos a trokar syertas leyes ke no fueron aprovadas por una grande partida de los Israelyanos. Miles i miles de Israelyanos empesaron a kaminar de Tel Aviv asta Yerushalayim para protestar esta ley. Ma lo mas emportante es ke en unas kuantas semanas munchas kompanyias de high tech dyeron karar de trokar de payis i abandonar Israel para ke sus kompanyias fonksyonen en otros payizes. Munchas personas travaron las paras ke tenian de las bankas para valorizarlas en otros payizes. Los Estados Unidos ke tyene una grande konfiensia en Israel, oy en diya no esta muy siguro de su situasion.
Para los Djudios ke biven en otros payizes, Israel es un refujio. Ma no en estas kondisiones. Un payiz ande las leyes estan en la mano de una persona komo otros payizes. Espero ke esta ley va ser retrasada.
